Жителите на селото Снетишам, Норфолк во Англија велат дека околу 100 диви кокошки ги водат во очај, бидејќи птиците им ги уништуваат градините, ги спречуваат да спијат, а храната што им е оставена ги привлекува стаорците, пишува „Гардијан“.

Жителите велат дека нивните животи се претвориле во пекол откако дивите кокошки долетале од блиската шума. Не е јасно кој е сопственик на земјиштето каде што живеат кокошките, но веруваат дека нивниот број од неодамна се зголемил.

Тие се пожалија и на напливот на луѓе кои патуваат во селото за да ги видат птиците и да им остават храна, што ги привлекува стаорците. Селаните го покренаа проблемот со нивниот парохиски совет, кој се заканува целосно да ги отстрани кокошките.

„Тие се мака. Ако дојдат во вашата градина, сè откопуваат. Тоа не е само храната за птици, туку секој дел од остатоци што можам да ги најдам ги привлекува стаорците. Стаорците се доста бројни овде и се размножуваат многу брзо“, кажал Род Мекензи, парохиски советник.

Бен Кинг кој живее на улицата каде што се гнездат птиците, рече дека морал да носи чепчиња за уши за да спие ноќе поради нивното постојано кокодакање.

„Тие се надвор од контрола. Ако некој дојде и ги отстрани, ќе го почестам со пиво“, рекол тој.

Сепак, другите се согласуваат кокошките да останат, велејќи дека птиците го зголемуваат селскиот шарм на селото.

„Немам никакви проблеми со кокошките. Пред да се преселиме овде, не знаевме дека кокошките стануваат во 4 часот наутро, но тоа му дава карактер на местото“, вели Грем МекКвејд, кој се преселил од Кембриџ.

Проблемите со непослушното јато кокошки беа покренати на последниот состанок на парохискиот совет на Снетишам. Во записникот пишува „Забележано е дека граѓани фрлаат разни видови храна за кокошките. Ова предизвикува проблем со глодароте кои се потенцијално опасни по здравјето“.