Дописникот на „Јуроњуз Албанија“ од Приштина, Косов Ѓоци, на Фејсбук објави дека вчера, како што вели, без причина бил нападнат од обезбедувањето на премиерот на Косово, Албин Курти.

Според Ѓоци, еден од телохранителите на Курти го турнал, откако новинарот се обидел да му пријде и да земе изјава од Курти. Обезбедувачот му ја зел опремата и ја фрлил на земја.

„Без причина, едниот телохранител ме турна и ми ја фрли целата опрема на земја, а другиот наместо да ме замоли да разговараме, ми се закани со зборовите „погледни добро и запомни“. Сево ова беше целосно непотребно и неприфатливо“, пишува Ѓоци во објавата.

Инцидентот се случил по средбата меѓу Курти и специјалниот пратеник на ЕУ, Мирослав Лајчак, пред главниот влез на косовската Влада.

Додека Лајчак излегол на еден излез пред поголема група новинари, Курти отишол на друг излез, каде го чекале Ѓоци и неколкумина негови колеги.

„Она што ме фасцинира, освен идиотското однесување на овие двајца членови на обезбедувањето на премиерот, е фактот што иако Курти виде и слушна поголем дел од оваа ситуација, тој само ја игнорираше во тој момент, па потоа дури излезе и разговараше со нас“, вели меѓу другото новинарот.