На сцената на Театарот за деца и младинци (ТДМ) – Скопје, на 6 јуни, во 19 часот, ќе се одржи премиерната изведба на претставата „Хајди“, која е работена според романот на светски познатата авторка Јохана Шпири, во режија на Драгана Гунин, а со драматизација на Драгана Лукан Николоски.

„Хајди“ претставува едно од класичните дела на детската литература. Десетици пати филмувана и драматизирана приказна за девојчето кое го наоѓа своето место под сонцето на планината, прегрната од природата.

– „Хајди“ претставува приказна за надежта и пријателството, за убавината на природата и чувството на слобода која таа ни ја дава. И покрај тоа што станува збор за приказна која се случува во едно друго време, „Хајди“ зборува за основните, примордијални чувства и потреби на децата, а со тоа и на сите луѓе. Потребата да се припаѓа и да се биде дел од природата, тој огромен организам во кој сите ние совршено се вклопуваме во моментот кога ќе се соголиме од она што ни го наметнува општеството.

„Хајди“ е приказна која нѐ посетува на тоа дека природата, пријателството и надежта, можат да ги излекуваат душата и телото, да ни помогнат дури и тогаш кога не сме свесни дека ни е потребна помош. Со ова ново читање, се обидовме да го ослободиме ова дело од сите нишки кои на денешните деца може да им бидат далечни и да ја прикажеме сликата за искреното и чисто пријателство, вгнездено во чистата природа, моќно да направи чуда за кои луѓето немаат одговор – истакнуваат од ТДМ.

Во претставата играат Ангела Димитрова, Петар Стојанов, Наташа Петровиќ, Владимир Лазовски, Ана Левајковиќ Бошков и Изабела Новотни. Музиката е на Ади Имери, костимографијата на Елена Вангеловска, а сценографијата на Кирил Василев.

Претставата е наменета за возраст од 6+ години, а премиерата е на 6 јуни, во 19 часот, посочуваат од НУ Театар за деца и младинци – Скопје.