Најдобрата македонска фудбалска репрезентација со победата на Националната арена „Тодор Проески“ – Скопје на 14 ноември против Исланд (3:1) направи историски успех со пласманот во баражот за учество на Светското првенство во Катар 2022.

За првпат една наша сениорска селекција ќе игра во мундијалски бараж и до остварувањето на целта остануваат уште две победи за избраниците на селекторот Благоја Милевски.

За поранешниот тренер на Македонија ЃП, Жикица Тасевски, националната А репрезентација со резултатите во последно време стана препознатлива на европската фудбалска мапа.

– Успехот на македонската А репрезентација е успех на кој сите во Македонија сме радосни и горди. После долги години од осамостојувањето на Македонија на репрезентативно ниво успеавме да се пласираме летово на едно големо фудбалско натпреварување како што е Европското првенство.

А сега еве следува и баражот за Светското првенство во Катар. Нашата репрезентација со резултатите во последно време стана препознатлива на фудбалската мапа во Европа. За тоа се заслужни сите кои што на било каков начин дадоа придонес за тој успех, тука мислам пред сè на фудбалерите, тренерите, Федерацијата и сите останати тренери во Македонија кои имаат работено со играчите кои сега се А репрезентативци – ни изјави Тасевски.

Квалификации за СП 2022 Катар
Група „Ј“, резултатите на Македонија:
Романија – Македонија 3:2
Македонија – Лихтенштајн 5:0
Германија – Македонија 1:2
Македонија – Ерменија 0:0
Исланд – Македонија 2:2
Македонија – Романија 0:0
Лихтенштајн – Македонија 0:4
Македонија – Германија 0:4
Ерменија – Македонија 0:5
Македонија – Исланд 3:1

Конечна табела:
1. Германија 27 бодови (директен пласман на СП)
2. МАКЕДОНИЈА 18 (бараж за СП)
3. Романија 17
4. Ерменија 12
5. Исланд 9
6. Лихтенштајн 1

– Да се освои 2 место во групата пред репрезентации со голема традиција како што се Романија, Ерменија, Исланд е сериозен успех и потврда дека пласманот на Европското фудбалско првенство не е случаен. Имаме навистина талентирана генерација и играчи кои што играат стандардно во сериозни лиги и клубови низ Европа, што мислам дека е клучно за резултатите кои ги постигнуваме. Би ги издвоил три клучни натпревари, тоа се победата против Германија во гости, Ерменија во гости и последната победа против Исланд, натпревар кој го игравме под голем психолошки притисок, а успеавме да го добиеме и да го потврдиме второто место. Успеавме да направиме голем исчекор и да излеземе од оној маѓепсан круг каде долги долги години во квалификациите не успевавме да се пласираме повисоко од четвртото место во групите – вели Тасевски.

Бараж за СП 2022 Катар
Жрепка, 26 ноември (17.00 часот, Цирих)

Носители: Италија, Португалија, Шкотска, Русија, Шведска, Велс
Неносители: МАКЕДОНИЈА, Турција, Полска, Украина, Чешка, Австрија

Репрезентациите ќе бидат поделени во три групи и ќе се игра по систем на елиминации, односно со жрепка ќе бидат одредени полуфиналните двојки, а победниците од тие дуели во меѓусебна пресметка ќе го одредат патникот на СП. Со жрепка воедно ќе се одреди кој ќе биде домаќин во финалето.

– Сега останува добро да се подготвиме силно да веруваме и без разлика со кого да играме во баражот да им дадеме силна поддршка на сите во репрезентацијата затоа што пласманот на Светското првенство ќе ни донесе уште поголем репрезентативен рејтинг, меѓутоа и развој на клупскиот фудбал. Фудбалот е нашиот најголем амбасадор кој се надевам покрај на Европско, ќе нè промовира во иднина и на Светско ниво – вели Тасевски.

Ангеловски: Во баражот би било многу потешко против Италија или Португалија