Обвинителството не постапува по пријавите на Државна комисија за спречување на корупција (ДКСК), но ниту по оние од МВР и на другите државни органи, вели за „Слободен печат“, Слаѓана Тасева претседателката на Транспаренси интернешенл. 

– Има истражување што го спроведе Транспаренси Интернешнел од кое се гледа дека од 350 случаи доставени до ЈО само 50 се најдени во судовите. Во најголем дел се чека да застарат. Прашање е што се случи со предметот Окта, ние го најдовме договорот во бирото на Груевски, или со Националната платежна картичка, предмет што е оценет како висока корупција со која е оштетен буџетот, или случајот Телеком кој со ДКСК го работевме по основа на пријава од укажувачот Симо Грујовски кој доби отказ од работа. И многу други предмети кои беа добро обработени. Не се во ред обвинувањата на адреса на ДКСК. Таа имаше голем успех со обработка на предметите (Фершпед да не го заборавиме, Иснифарис Џемаили исто така). Откако ние покажавме резултат, политичарите решија да ја стават под контрола, па од 2007 – 2017 ништо не сработи. Проблемот и денеска е во Јавното обвинителство, и МВР и Финансиска полиција се прашуваат до каде се нивните пријави, вели Тасева.

До Јавното обвинителство во изминатите три години од страна на ДКСК се поднесени 18 иницијативи. Од овие 18 иницијативи, за шест се добиени одговори, од кои две се одбиени, за две фактичката состојба е променета бидејќи лицето е починато, а за две иницијативи Јавното обвинителство се уште постапува.

ДКСК минатата недела и предложи на Управата за финансиска полиција да ја прошири кривичната истрага против поранешниот министер за локална самоуправа Сухејл Фазлиу за злоупотреба на службената положба. Како што појасни членот на ДКСК, Нури Бајрами, случајот е формиран на негова иницијатива, поточно по гласините во медиумите против поранешниот министер за локална самоуправа. Сухејл Фазлиу кој беше министер од 1 јуни 2017 година до 26 јуни 2019 година се товари за злоупотреба на службената положба, како и несвесното работење.