„Тука има, сигурно, нешто друго во позадина, што ние не го знаеме и гледаме“, рече Слаѓана Тасева од „Транспаренси интернешнл“ во вечерашната „Топ тема“ на „Телма“ во врска со контроверзите околу договорот за изградба на автопатишта во земјава.

Емисијата беше посветена на предложените измени на девет закони поврзани со изградбата на автопатиштата од коридорите 8 и 10, која Владата со специјален закон и без тендерска постапка му ја довери на американско-турскиот конзорциум „Бехтел и Енка“. Владата сега одбива да го објави договорот вреден 1,3 милијарди буџетски пари што го потпишала, со образложение дека компанијата барала тој да биде таен.

Тасева вели дека американскиот гигант „Бехтел“, најголемата градежна компанија во САД, всушност низ целиот свет важи за нетранспрарентна и проблематична компанија, која инсистира на тајни договори.

„’Бехтел и Енка’, како компанија, важи за една од најнетранспарентните во светски рамки. Работат насекаде низ светот, на големи комерцијални договори, меѓутоа важат за една од најнетранспарентните компании кои апсолутно инсистираат на тајност на нивните договори. И уште еден податок кој вели дека секогаш нивните проекти завршуваат со 40 проценти повеќе од договорената сума“, рече Тасева.

Според неа, таквите податоци треба да нè алармираат – зошто ние всушност сме се нафатиле на таков договор.

„Имаме примери со работењето на таа компанија и тука непосредно, и во Хрватска и во Косово и во Романија, каде што имало проблеми со транспарентноста, каде што имало проблеми со цената, како и со договорот. И секаде останало тоа до крај да остане нетранспарентно, до крај контроверзно и до крај скапо, за државите да плаќаат многу повеќе од тоа што е договорено“, потенцира Тасева.

Таа додава дека Македонија, како држава, има потреба од стратешка поддршка од САД, но и дека „треба да знаеме во што е суштината на еден ваков договор“.