Поранешниот претседател на Србија, Борис Тадиќ смета дека Србија е во специфична ситуација каде што владата го урнала уставниот поредок, а граѓаните вовеле вонредна состојба. Во интервјуто Тадиќ вели дека владата на Александар Вучиќ со години го крши Уставот, а сега го изгубила кормилото и затоа логично е него да го преземат граѓаните. Екс претседателот вели дека сите блокади во Србија не биле почнати од граѓаните, туку од власта која направила другите форми на учество во политичкиот живот во Србија да бидат невозможна мисија.

Тој во интервју за „Данас“ посочи дека единствен излез од актуелната состојба се вонредни избори, на кои треба да им претходи создавање заедничко движење на студентите, граѓаните и опозицијата.

-Со години, режимот систематски работеше на пасивизација на граѓаните, меѓутоа, и покрај годините заплашување, перење мозок и уништување на политичката свест, студентите успеаја да ги реактивираат граѓаните да учествуваат во политичкиот живот и да ја подигнат енергијата што беше мирна со години. Бидејќи режимот ја уништи секоја форма на институционална политика, вклучително и опозицијата, вклучувањето на граѓаните во политичкиот живот беше можно само на овој начин – на улица“, рече Тадиќ.

Според него, претседателот Александар Вучиќ владее автократски и е на работ на пропаѓање па мора во очајнички постапки да посегне по насилство.

„Распишување избори е апсолутно единственото решение за излез од оваа криза. Фактот дека режимот што свикуваше избори речиси секоја година сега бега од тоа, јасно покажува дека тие се свесни како би поминале на тие избори. Сега не само што не свикуваат вонредни избори, туку и избегнуваат да свикуваат редовни, и со тоа брутално го кршат законот, како што е случајот со избегнувањето свикување избори за месните заедници во Нови Сад“, изјави Тадиќ.

„Откако 16 луѓе беа убиени во еден миг, единственото нешто во интерес на овој режим е да се повлече од власт. Ова значи свикување избори, на кои несомнено би изгубиле. Секако, ова значи дека секој што сторил кривично дело, не само во случајот со бетонската натстрешница, туку и за сите злосторства во претходните 13 години, треба да биде повикан на одговорност“, вели Тадиќ