Книжевната едиција „Порта Европа“, во издание на „Арс ламина“, се состои од шест книги, сите добитнички на престижната Европска награда за книжевност последните неколку години, што ја доделува Европската Унија: „Кожата е еластичната обвивка што го опфаќа целото тело“ од Бјорн Расмусен, „Градина од стакло“ од Татјана Цибуљак, „Приказна за духовите“ од Лаура Фројденталер, „Почитувани бубачки и други морничави приказни“ од Маша Колановиќ, „Лекцијата на месечарот“ од Фредерико Педреира и „Книга за тагата (Приказна за Нилс во шумата)“ од Марија Наваро Скарангер.

На тематска промоција книгите ги претставија Бисера Бендевска и Оливера Ќорвезироска, уреднички на книгите, заедно со двајца од преведувачите: Дејан Василевски (преведувач од хрватски јазик на „Почитувани бубачки и други морничави приказни“) и Ермис Лафазановски (преведувач од романски јазик на „Градина од стакло“) и двајца од дизајнерите на кориците: Андреј Лавчански (дизајнер на корицата за „Градина од стакло“) и Лара Маринковиќ (дизајнерка на корицата за „Приказна за духовите“).

Објавувањето на оваа едиција, кофинансирана од Европската Унија, е засновано на еколошка заднина и во насока на ублажување на економските ефекти од рестрикциите предизвикани од пандемијата на ковид-19 врз издавачкиот сектор, преку соработка со чинители од синџирот на книгоиздателството на домашниот пазар.

Сите шест прозни дела во себе носат приказна од сопствениот културен контекст, а истовремено меѓусебно се допираат во интроспективните аспекти и отсликувањето на внатрешните борби на носечките ликови. Проткаени се со нишки од опачината на животот, се занимаваат со горливи проблеми и состојби во нашето современо општество: отфрленост, осаменост, ментални болести, кризи на идентитетот, самоубиство…

Пет од насловите се романи, шестиот наслов („Почитувани бубачки и други морничави приказни“) е збирка раскази. Заедничко за романите е тоа што се главно фрагментарни, но во рамките на тоа, секој од нив е сосем свој и различен.

(Текстот е објавен во „Културен печат“ број 220, во печатеното издание на весникот „Слободен печат“ на 2-3.3.2024)