На 1 мај, Одборот на извршни директори на Светската банка одобри заем од 79,90 милиони евра и грант од 2,89 милиони евра за Босна и Херцеговина, објави Кликс.ба.

Тие посочија дека овие финансиски средства се наменети за Интегрираниот план за енергија и клима на Босна и Херцеговина, подобрувањето на енергетската независност, зголемувањето на можностите за создавање нови работни места и зајакнувањето на локалните економии во регионите кои претходно зависеа од јаглен.

Проектот за праведна транзиција во одбрани региони богати со јаглен во Босна и Херцеговина, како што образложија, ќе обезбеди помош за пренамена на поранешното рударско земјиште во Бановиќи, Зеница и Крека и ќе го олесни затворањето на јамите на рудникот Зеница.

Дополнително, како што најавија, ќе се обезбеди поддршка за инсталирање на системи за обновлива енергија на земјиштето на рудниците Бановиќи и Крека, ќе се обезбедат мерки за социјална заштита и програми за обука за работниците од овие заедници за да им се овозможи вработување во други сектори.

„Овој нов проект претставува можност за подобрување на енергетската безбедност на Босна и Херцеговина, а воедно и обезбедување поддршка на локалните заедници, за да се осигури дека никој не е изоставен“, изјави Кристофер Шелдон, раководител на канцеларијата на Светска банка за Босна и Херцеговина и Црна Гора.