Многу возрасни кои се чувствуваат здрави и сè уште не се блиску до пензија, не размислуваат за ризикот од мозочен удар. Меѓутоа, податоците покажуваат дека бројот на мозочни удари кај луѓето помлади од 64 години е во пораст.

Покрај познатите фактори на ризик, новото истражување открива една интересна врска која може да изненади многумина.

Научниците од Универзитетот во Мериленд анализирале речиси 50 студии и откриле дека крвната група може да игра улога во ризикот од ран мозочен удар.

Луѓето со крвна група А имаат 16 отсто поголем ризик од исхемичен мозочен удар пред 60-тата година од животот. Од друга страна, крвната група нулта е поврзана со 12 отсто помал ризик.

„Под вистински околности, комбинацијата на одредена крвна група и други фактори може да ја зголеми шансата за формирање на згрутчување на крвта“, рекол неврологот д-р Џејсон Хинман за „Парада“.

Научниците сè уште не се сигурни зошто крвната група го има овој ефект, но се претпоставува дека различни површински карактеристики на крвните зрнца може да ја зголемат веројатноста за згрутчување на крвта.

Меѓутоа, експертите нагласуваат дека нема причина за паника – севкупниот ризик останува низок.

„Нема потреба од дополнителни тестирања“, велат истражувачите, додавајќи дека се потребни повеќе податоци, особено од различни популации.

Иако не можеме да ја промениме својата крвна група, можеме да направиме многу други работи за да го намалиме ризикот.

Доктор Хинман советува да внимавате на познатите фактори како што се дебелината, високиот крвен притисок и дијабетесот.

Според Центарот за превенција и контрола на болести (ЦДЦ), здравата исхрана, редовното вежбање и откажувањето од пушење може значително да помогнат.

„Генетскиот ризик не може да се промени, но можеме да контролираме други фактори и на тој начин да го спречиме најлошото“, заклучил д-р Хинман.