Луѓето кои се откажуваат од пушењето, дури и во зрелaта доба, би можеле да го продолжат својот животен век, според новото истражување.

Наодите укажуваат дека никогаш не е доцна да се направи избор на здрав начин на живот.

Научниците за јавно здравје од Универзитетот во Мичиген (У-М) велат дека нивното истражување ја поддржува „многу важната проценка дека откажувањето од пушење е најдоброто нешто што луѓето можат да го направат за да го продолжат својот животен век“.

Тоа сознание би можело сериозно да ги мотивира луѓето кои пушат цел живот и кои можеби се помириле со долгорочниот зголемен ризик од рак или кардиоваскуларни болести.

Студијата спроведена на речиси 13.000 средовечни мажи покажала дека оние што пушеле 30 или повеќе цигари дневно на почетокот на студијата се соочиле со 21 отсто поголем ризик од смрт во следните 25 години, пренесува „Саенс алерт“ (Science alert).

Но, овие ризици не се зацртани во камен. Бројни студии открија дека откажувањето од пушење на која било возраст е придружено со краткорочни здравствени придобивки, а истражувачите од У-М сега открија дека долгорочните придобивки не се ограничени само на младите и средовечните возрасни кои се откажале од пушењето.

Нивните проценки укажуваат дека луѓето на возраст помеѓу 35 и 75 години, кои пушеле во минатото, значително го продолжиле својот животен век со откажување од цигарите.

Користејќи јавно достапни, национално репрезентативни здравствени податоци, тимот извршил низа пресметки за да го процени просечниот број на изгубени години поради пушењето и просечните години добиени со откажување од пушење во различни години.

Разгледуваната возраст за откажување од пушење била 35, 45, 55, 65 и 75 години.

Очекуваниот животен век на оние што престанале да пушат бил спореден со оние кои продолжиле да пушат во овие специфични години и оние кои никогаш не пушеле во тие години, а овие проценки биле претставени на основа на веројатност.

Во споредба со оние кои никогаш не пушеле, предвидено е дека лицата кои пушеле на 35-годишна возраст и продолжиле да пушат до крајот на животот ќе изгубат околу девет години од животот во просек, што е 23 отсто од вкупниот животен век.

Спротивно на тоа, луѓето кои се откажале од пушењето на 35 години имале само околу една година разлика во очекуваниот животен век во споредба со оние кои никогаш не пушеле. Со други зборови, тие го вратиле, во просек, околу осум години од очекуваниот животен век.

Наодите се поддржани од претходна студија на истражувачи од Канада и Норвешка, кои откриле дека ако некое лице може да престане да пуши една деценија, потенцијално може да ја спречи изгубената деценија од животот. Но, дури и во староста имало придобивки за очекуваниот животен век.

Сегашното истражување се согласува. Поединците кои пушеле на 75-годишна возраст и кои продолжиле до крајот на својот живот се предвидува дека ќе изгубат околу 4,4 години од животот во просек, што е речиси 50 отсто од очекуваниот животен век на оваа возраст.

Меѓутоа, врз основа на кривата на веројатноста, шансите да добијат најмалку една година живот меѓу оние кои престанале да пушат на 65 и 75 години се 23 отсто, односно 14 отсто, што не е нешто што треба да се игнорира.

Јасно е дека најмногу придобивки доаѓаат кога пушачите се откажуваат порано отколку подоцна, но тоа не значи дека откажувањето од пушење цигари на постара возраст е губење време. Тоа всушност може да ви даде време.

„Овие наоди може да бидат драгоцени за лекарите кои бараат научни докази за да ги мотивираат своите пациенти кои пушат да се откажат од пушењето“, заклучуваат истражувачите на У-М.