Домашните мачки можат да го разликуваат мирисот на своите сопственици од оној на странци, покажа нова студија од Универзитетот за земјоделство во Токио.

Познато е дека мачките го користат своето силно чувство за мирис за да идентификуваат и да комуницираат со други мачки, но истражувачите сè уште не утврдиле дали можат да го користат и за да разликуваат луѓе, објавува Би-би-си.

Претходните студии покажаа дека мачките можат да разликуваат гласови, да го протолкуваат погледот на некого за да најдат храна и да го менуваат своето однесување според емоционалната состојба на лицето.

Во студијата учествувале 30 мачки, а истражувачите поставиле пред нив пластични цевки или стапчиња со мирисот на нивниот сопственик, стапче со мирис на лице од ист пол, странец и чисто стапче .

Брисеви што ги содржеле мирисите биле триени под пазувите, зад ушите и меѓу прстите на сопственикот или странецот, а мачките поминале значително повеќе време душкајќи ги мирисите на непознати луѓе во споредба со нивниот сопственик или празна цевка, што укажува дека можат да разликуваат мириси на познати и непознати луѓе, се вели во студијата.

„Потребни се експерименти за однесување во кои на мачките им се презентираат повеќекратни стимули од мирисите на познати луѓе, а ние би требало да пронајдеме специфични модели на однесување кај мачките што се јавуваат само како одговор на мирисот на сопственикот“, вели научникот Хидехико Учијама.