На студент од Флорида му стана навика да им „влегува под кожа“ на некои од најбогатите и најпознати луѓе во светот. Како? Со тоа што им кажува на луѓето каде летаат приватните авиони на познатите, и колку јаглерод испуштаат. Неговото име е Џек Свини.

Свини би сакал да разјасни неколку детали. Како прво, тој мисли дека Тејлор Свифт има некои добри песни. Но сепак, тој верува, и покрај заканата од правна постапка, дека секој треба да може да види каде се движи нејзиниот приватен авион и колку често лета.

„Сакам да бидам фер“, изјави тој за Би-Би-Си. „Се обидувам да ги споделам сите информации без разлика за кого станува збор“.

Но, токму информациите за локациите на приватните авиони на богатите и моќните, објавени на неговите профили на социјалните мрежи, постојано го прават 21-годишниот предмет на вести и правни закани.

Taylor Swift has landed at LAX @LAFlightsLIVE pic.twitter.com/XL5mhtUEnz

— Jack Sweeney (@Jxck_Sweeney) February 10, 2024

Свини е син на контролор на операции за одржување на авиокомпании, а пораснал во предградијата на Орландо. Тој вели дека отсекогаш имал интерес за авијацијата и технологијата, а особено за компаниите СпејсИкс и Тесла на Илон Маск.

Тие интереси постепено го навеле да развие веб-страница за следење авиони, TheAirTraffic.com, и профили на социјалните мрежи кои ги следат авионите на познати личности, политичари, тајкуни и руски олигарси.

Системот се потпира на јавно достапни податоци собрани од аматерски ентузијасти. Авионите на небото редовно испраќаат информации за тоа каде се наоѓаат, а овие сигнали може да ги земат луѓето кои користат евтини приемници на земјата.

Оваа просперитетна група на онлајн-трагачи на авиони е дел од поголемата заедница Осинт, полна со луѓе кои истражуваат слободно достапни онлајн податоци во потрага по инкриминирачки, проникливи или едноставно интересни информации. Тоа е екипа која вклучува низа поединци, од благо љубопитни до посветени истражувачи и посветени истражувачки новинари.

„Оргинално ова го правев само како хоби бидејќи ми беше интересно“, рече Свини, кој моментално е трета година на факултетот за информатичка технологија на Универзитетот во Централна Флорида.

Како што одминувало времето, тој нашол поодредена цел. Тој верува „во важноста на транспарентноста и јавното информирање“.

Неговите податоци се користени во студиите кои ги покажуваат огромните емисии на јаглерод кои ги користат приватните летови на пејачката Тејлор Свифт. Пејачката вели дека купила доволно количество на јаглерод за да ги поништи емисиите од нејзината последна турнеја. Но, во прашање се и проблеми со приватноста. Свифт, преку своите адвокати, тврди дека откривањето на локацијата на нејзиниот приватен авион ја става на ризик од демнеење.

Во писмото што првпат го откри Вашингтон пост, адвокатите на пејачката напишаа дека следењето на авионот е „работа за живот или смрт“ и дека „нема легитимен интерес или јавна потреба за овие информации, освен за следење, вознемирување, и врши доминација и контрола“.

Свини ги отфрла тие тврдења и вели дека постои фундаментален јавен интерес за лоцирање на авионот на поп-ѕвездата. Неговиот доказ? Самите фанови на пејачката.

„Нејзините обожаватели, кои се најмногу присутни на социјалните мрежи, се оние кои навистина се заинтересирани“, вели тој. „Овие профили за следење постојано имаат повеќе поддржувачи и обожаватели, отколку неистомисленици“.

И со оглед на светските турнеи и бројните јавни настап, обично е прилично лесно да се открие каде ќе биде Свифт во одреден момент. Во текот на изминатите две недели, на пример, беа објавени бројни приказни во кои се наведува како таа би можела да патува помеѓу два итни ангажмани, нејзиното шоу во Токио и неделниот Супербоул во Лас Вегас.

Голем дел од овие јавни информации се повеќе достапни од локацијата на авионот. Податоците за летот може да покажат кој поседува авион и каде се наоѓа на небото, но не и кој е во него или каде патуваат тие луѓе откако ќе слета авионот.

Но, претставниците на Свифт велат дека информациите за летовите даваат точни времиња и локации на нејзините движења и забележуваат дека еден човек неодамна бил уапсен пред нејзиниот дом во Њујорк.

Свини, исто така, имаше неколку совети за ѕвездата, нежно сугерирајќи дека ако приватноста е нејзината најголема грижа, таа може да го регистрира својот приватен авион преку анонимен корпоративен субјект и можеби да избере код за идентификација што не ги вклучува нејзиниот роденден и иницијалите.

Џејмс Слејтер, адвокатот на Свини, вели дека не очекува Свифт да преземе дополнителни правни мерки.

„Писмото беше обид да се малтретира Џек да направи нешто што законски не мора да го прави“, рече тој. „За жал, луѓето со моќ и пари често го прават тоа“.

Ова не е прв пат Свини да биде под притисок од богатите и славните. Најзначајно, кога го купи Твитер (сега Икс) во 2022 година, Илон Маск вети дека во име на слободата на говорот нема да преземе мерки против профилот за следење на летови на Свини, Илонџет.

Меѓутоа, за неколку недели, Маск го промени ставот, го забрани профилот и се закани дека ќе тужи, тврдејќи дека Илонџет резултирал со тоа што некој го следел и се качил на нековиот авион кога неговото мало дете било внатре. Полицијата подоцна идентификуваше член на безбедносниот тим на Маск како осомничен и рече дека профилот на Свини нема никаква врска со инцидентот.

Свини сега води профил кој го следи приватниот авион на Маск со 24 часа задоцнување, со цел да се усогласи со правилото на страницата за забрана за следење локација во реално време. Тој, исто така, води сметки на неколку страници на социјални медиуми, следејќи ги авионите во сопственост на Ким Кардашијан, Џеф Безос, Бил Гејтс, Марк Закерберг, Доналд Трамп и други.

Но, тој изрази фрустрација поради правилата на социјалните мрежи, истакнувајќи дека Мета ги суспендирала профилите на Фејсбук и Инстаграм за следење на авионот на Свифт, но остави разни други профили за следење авиони, вклучувајќи ги и оние што го следат авионот на Закерберг.

Во меѓувреме, продавачите на авиони кои разговараат на серверот на Свини на апликацијата Дискорд го бранеа неговиот став, заедно со нивниот ентузијазам за нивното хоби. А некои признаа дека и тие се обожаватели на Свифт.