На студентите ќе им биде обезбеден бесплатен  превоз од следната година. Како што соопшти премиерот Христијан Мицкоски, заедно со министерката за образование предвиделе средства за оваа намена.

– Овие средства во разговор со министерката ги предвидовме за следната година. Претходната Влада не ги предвидела овие средства нити потпишала договор, мислам дека се тоа 120 милиони денари за следната година. Тоа е далеку од она што е потребно на ЈСП, но ние излеговме во пресрет кога требаше да се интервенира за да се обезбеди нафта за да можат автобусите да се сообраќаат соодветно и да превезуваат патници. Се што е во интерес на граѓаните ние ќе направиме, граѓаните не смеат да трпат. Во рамките на нашите ингеренции се разбира. Не смееме ни ние како Влада да излеземе надвор од нашите ингеренции бидејќи утре ќе бидеме обвинети дека ненаменски сме потрошиле пари од буџетот – истакна Мицкоски на новинарско прашање дали ќе има пренамена на средства.

За потсетување, последната исплата на Министерството за образование и наука кон ЈСП е направена во 2021 година, кога се исплатени два милиони евра. Од 2022 година до денес нема донесена одлука за вршење субвенциониран линиски превоз за студенти, а ЈСП самостојно решило да продолжи бесплатно да ги вози студентите.

ЈСП доброволно ги вози студентите, договорот за бесплатен превоз не е продолжен од 2022 година

Законот за високо образование вели дека Владата може да донесе одлука за посебни погодности за студентите, како што се студентска картичка за попусти, бесплатен градски превоз и друго, при што средствата се обезбедуваат од државниот Буџет.

Причината за тоа што тогаш не била продолжена оваа одлука е поради пандемијата ковид-19, кога студентите не посетуваа настава со физичко присуство. Иако во соопштението што тогаш го објавило Министерството се наведува дека тие ќе предвидат средства во својот буџет за 2023 година, тоа не било направено.

Министерката Весна Јаневска тогаш изјави дека е точно дека стигнале фактури за наплата, но немаат основ врз кој би ги исплатиле тие средства.

– Точно е дека стигнаа фактури за наплата на огромни средства за кои Град Скопје тврди дека треба да ги исплатиме. Ние спогодба ниту со ЈСП ниту со Град Скопје немаме и јас како министер немам основа врз која би ги исплатила тие средства. Доколку не се најде поинакво решение ние како министерство ќе мора да одиме на суд, а тоа така и ќе биде. Ниту јас ниту оваа Влада беше таа која ветуваше бесплатен превоз за сите. И ние за бесплатниот превоз за сите не можеме да одговараме – изјави Јаневска.

Универзитетското студентско собрание на Универзитетот „Св. Кирил и Методиј“ Скопје вчера испрати апел до Владата и Министерството за образование и наука, на владина седница да овозможат релоцирање на средства со цел продолжување на бесплатниот превоз за студентите во 2025 година.