Студентите Матеј Милосиевски и Андреја Поповиќ од Машински факултет Скопје и Факултетот за електротехника и информациски технологии заедно создадоа уред за рециклирање отпад од полиетилен терефталат (PET) во суровина потребна за 3D печатење.

PET претставува термопластична полимерна смола од семејството на полиестерите и најмногу се користи во влакна за облека познати како полиестер, како и во контејнери за течности и храна. Годишното производство на овој тип смола на светско ниво е околу 50 милиони тони.

„Овој метод користи пултрузија наместо традиционалното обликување за формирање рециклиран PET (rePET) филамент. Припроцесот на пултрузија, полимерот се загрева доволно за да се обликува без целосно топење на материјалот, нудејќи потенцијални заштеди на енергија. Процесот на добивање на rePET филамент почнува со отпадниот PET, во овој случај е пластично шише, по што следи загревање и обликување под константен напон преку модифицирана дизна до стандарден дијаметар на филамент за 3D печатење“, објаснува Милосиевски.

Проектот е поддржан од Универзитетот „Св. Кирил и Методиј“ во Скопје, преку повикот за финансирање научноистражувачки проекти за 2023/2024.

„Оваа студија служи како доказ за концептот за одржливо рециклирање на PET за филамент за 3D печатење, иако е потребно понатамошно усовршување и оптимизирање на процесот за индустриска употреба. Идните истражувања ќе се фокусираат на подобрување на униформноста на филаментот и истражување на оптималните параметри за 3D печатење. Овој проект придонесува за напредокот на одржливите производствени практики преку обезбедување иновативно решение за отпадниот PET“ додаде тој.

Двајцата студенти се надеваат дека овој проект ќе биде инспирација и мотив за многу идни студентско-предводени проекти насочени кон подобрување на општеството.