Во КСП „Центар-Јадро“ на 6 март беше отворена изложбата „Архитектонско и урбанистичко решение за нов студентски кампус“ на Архитектонското (интегративно) студио, 9 семестар 2022/2023 год., при Архитектонскиот факултет во Скопје. Локација за реализација на темата е Кеј на реката Вардар (Судска палата 1), Скопје.

Во процесот на транзицијата, после осамостојувањето на Македонија, голем број делови и урбани единици во градот Скопје останаа плански и просторно недефинирани. Една од тие урбани целини е т.н. блок „Судската палата 1“, во кој се наоѓаат најзначајните јавни објекти од национален и општествен стандард во градот Скопје.

Преку програмско и просторно истражување во предметната област, проектната задача претпоставува „иден модел“ на студентско домување и учење како дел од кампусот на УКИМ, а воедно и просторно дооформување на урбаниот блок „Судска палата 1“.

Студентите ги анализираа веќе постоечките студентски капацитети во Скопје на програмско и типоморфолошко ниво. Преку препознавање на генеричките обрасци на постоечките објекти, анализата имаше за цел воспоставување метода на трансфигурација, трансформација и транскрипција во нови типолошки конфигурации.

Предложените архитектонски решенија во студиото истакнаа неколку аспекти за важноста на локацијата: присуството на јавна општествена институција во централното подрачје на градот Скопје, студентите како идна интелектуална елита на државата се корисници на објектот и високиот стандард на времено домување во објектот изразен преку содржините кои тие ги акомодираат.

Проектот за нов студентски кампус го подготвија триесетина студенти на Архитектонскиот факултет, а во педагошкиот тим за реализација на проектот се проф. д-р Михајло Зиноски, раководител, Котларовски Игор диа., Александра Марсениќ Крајчески спец. арх, Наташа Тодоровска Пренк диа.,Оливера Ќоќоровска Митиќ диа., Јана Брсакоска м.арх.

Изложбата ја отвори Горан Герасимовски, градоначалник на Општина Центар, а ќе може да се посети до 10 март.