Инспектори на Агенцијата за храна и ветеринарство (АХВ), утрово спровеле вонреден надзор во кланица во Струмица, откако вчеравечер на „Фејсбук“ се појавила информација дека кланицата испушта крв од закланите животни директно во река.

АХВ соопшти дека „операторот“, односно фирмата, чие име, како ни реката во која е испуштена крвта, државната агенција не го открива, е казнета со вкупно 2.400 евра.

„Со надзорот е утврдено дека операторот постапува спротивно на законските одредби за нештетно отстранување на нуспроизводи (член 18 од Законот за нуспроизводи од животинско потекло – Сл. весник на РСМ бр. 08-3248/1 од 14 јуни 2023 година). За сторен прекршок – нештетно отстранување и употреба на Категорија 3 материјал – нуспроизводи од животинско потекло и производи добиени од нив, согласно категоризацијата на нуспроизводите од животинско потекло (член 11 и 14 од Законот), операторот е казнет со парична казна од 2 илјади евра во денарска противвредност, а одговорното лице во правното лице со 400 евра во денарска противвредност“, велат од АХВ.

„Наредено е доследно спроведување на законските процедури за отстранување на нуспроизводи од животинско потекло од категорија 3 (крв од животни заклани во кланица кои не покажуваат знаци на болест). Крвта како нуспроизвод од колењето животни (нус производ од категорија 3), согласно законските и подзаконските акти кои ја уредуваат оваа материја, треба да се отстранува со претходно одвојување и собирање во посебно место“, додаваат од државната агенција.