Стопанската комора на Северна Македонија денеска во Белград му додели на поранешниот премиер Зоран Заев Голема плакета, како признание за особен придонес во креирањето и продолжувањето на регионалната иницијатива Отворен Балкан,

Плакетата му беше врачена на Заев од претседателот на Комората, Бранко Азески, на Саемот за вино, храна и туризам „Винска визија на Отворен Балкан“.

Поранешниот премиер го добива ова признание од Комората, откако таа претходно им го додели и на албанскиот премиер Еди Рама, српскиот претседател Александар Вучиќ и на македонскиот премиер Димитар Ковачевски.

„Благодарам на Стопанската комора за честа што ни ја укажа на лидерите од овие три земји за Иницијативата „Отворен Балкан“, бидејќи само заедно сплотени регионално, можеме да направиме многу повеќе за економиите на сите земји дел од процесот, да обезбедиме поголема економска соработка, повеќекратно зголемување на размената што ќе придонесе за побрз развој на регионот и благосостојба за граѓаните“, рече Заев.

Тој рече дека како бизнисмен, ќе продолжи да ги поддржува сите иницијативи во рамки на процесот Отворен Балкан, бидејќи тие влијаат на „развојот на бизнисите, приходите во буџетите на државите и со тоа влијаат на економската перспектива на регионот на западен Балкан“.

Заев додаде и оти се надева дека и останатите земји од овие простори ќе се приклучат на Иницијативата за сите заедно да чекорат на зацртаниот пат кон Европската Унија.