Стопанската комора на Македонија бара стабилност и висока одговорност за моментот во кој што се наоѓаме, посочи претседателот на комората, Бранко Азески. Според него, нормално да има различни мислења и ставови, но СКСМ нема да се откаже од приоритетите кои ги истакнуваат во секоја прилика.

– За нас е приоритетна борбата против корупцијата и сивата економија, но несомнено се важни и гасификацијата, зголемувањето на конкурентската способност на извозните компании, иновативноста на производите. Не се откажуваме и од барањата за промена на законските решенија кои што ќе овозможат подобра бизнис клима, а не се мрднати со години, како што се Законот за извршување, Член 218, парафискалните давачки, регулаторната гилотина итн. Овие теми мора да се симнат од дневниот ред, а мора да се подобри социјалниот дијалог меѓу социјалните партнери – рече Азески, пред почетокот на седницата на Управниот одбор на Коморскиот инвестициски форум (КИФ), асоцијација која ги обединува шесте стопански комори од регионот на Западен Балкан.

Тој исто така се осврна и на заострувањето на економската ситуација во Европа која е последица на подолги процеси на кои што ние не можеме да влијаеме.

-Промената на власта во Америка, воспоставувањето на нова политика, војната во Украина која продолжува и се пренесува на други држави… ова е огромна неизвесност, која има огромно влијание врз бизнисот. Со оглед на фактот дека Германија е наш најголем трговски партнер сигурно ќе имаме последици, бидејќи состојбите во Германија се такви какви што се – објасни Азески.

Тој додаде дека поради тоа, комората предлага платформа да се пребродат овие кризни ситуации кои што не очекуваат.

-Има позитивни сигнали во однос на продолжувањето на инвестициската активност на странските инвеститори, а и домашните компании се подготвени за евтините кредити и со нив да стартуваат значаен процес на инвестициска активност. Тука се и „Бехтел и Енка“, кои почнаа со работа. Може да се констатира дека се отвора фронт за големи работи, има некои најави околу железницата,… сето тоа зборува дека многу внимателно треба да одиграме во 2025 година за да немаме тешки последици кои што може да дојдат надворешно – рече Азески.

Во однос на растот на платите и на пензиите тој рече дека ставовите на Комората се јасни – тој мора да биде врзан за растот на домашниот БДП. Тој додаде дека бизнисот е единствениот кохезионен фактор без кој што не можеме да одиме напред, како и дека е добро инвестициската активност да биде поддржана од сите заради тоа што само на таков начин е можно во наредниоот период да направиме исчекор.