Селекторот на фудбалската репрезентација на Србија Драган Стојковиќ – Пикси ги сподели своите впечатоци по натпреварот против Албанија.

Двете репрезентации одиграа нерешено во Тирана (0:0) во квалификациите за Светското првенство 2026.

– Не знам што да ви кажам. Дојдовме да победиме. Формацијата со која игравме покажува дека сакавме да постигнеме гол. Момците беа професионални, не подлегнаа на атмосферата. Не е лесно да се игра на овој стадион, Албанија е добра и квалитетна репрезентација. Нерешениот резултат е најреален. Овој бод е посладок за нас отколку за нив – рече Пикси.

Тој се осврна и на играта на своите фудбалери:

– Кога имате добра циркулација на топката, противникот трча повеќе. Колку повеќе трча, толку повеќе се заморува. Во соблекувалната по првото полувреме, инсистирав топката да оди побрзо. Мислам дека ја контролиравме играта. Бевме смирени, знаевме како да играме и што да правиме на крајот. За да победите во натпревар, мора да постигнете гол. Не можете да создадете 10-15 шанси. Ако добиете една, две, три шанси, мора да ги искористите. Направивме што сакавме. Недостасуваше гол за да го направиме чувството комплетно – се зборовите на Пикси.

Следниот противник на Србите во мундијалските квалификации е Андора во вторник во Лесковац.

– Распоредот е тесен. Сите сме под ист третман. Мора да видиме каква е ситуацијата, да се вратиме дома. Мора да го добиеме тој натпревар. Дали некој е уморен или не, тоа не ме интересира. Победата против Андора е императив. Имаме квалитет и ќе го покажеме тоа против Андора – вели Пикси.