Промоцијата на „Празно место“ од поетесата Снежана Стојчевска ќе се одржи на 23 август, во 19 часот, во КИЦ „Култура 365“ во Охрид, а е во организација на „Креативна верига“. Промотор на книгата ќе биде Марина Икономова Шокева.

Снежана Стојчевска (1980) дипломирала на Институтот за педагогија при Филозофскиот факултет во Скопје. Застапена е во повеќе антологии и книжевни списанија и има објавено повеќе книги: „Шеќер по подот“ (2012, „Или-Или“), „Под нулата“ (2013, награда „Бели мугри“ што ја доделува Домот на културата „Кочо Рацин“ – Скопје), „Модри фантазии“ (2015, „Темплум“), „Треба да е лесно“ (2017, „Антолог“), „Ќе се завијам во песни“ (2019, „Ми-Ан“) и „Празно место“ (2022, „Современост“).

Од почетокот на 2018 година е ангажирана како извршен уредник на списанието за литература, култура и уметност „Современост“. Истата година станува дел од европската платформа „Версополис“. Во 2019 г. се јавува како приредувач и уредник на арт-панорамата „Допир“, во издание на „Арт Еквилибриум“, Гевгелија.

Член е на Друштвото на писателите на Македонија. Беше дел од организацискиот одбор на првото издание на Скопскиот поетски фестивал (2021). Од април 2022 година ја извршува функцијата директор на Градската библиотека „Браќа Миладиновци“ ‒ Скопје.