Актерот Стенли Тучи проговори за својата борба со ракот, кој му беше дијагностициран неколку години откако неговата прва сопруга, Кејт, почина по борбата со истата болест. На актерот му беше дијагностициран рак на јазикот во 2017 година, а искуството, вели тој, му помогнало да го промени животот.

Тучи сега е без рак по 35-дневен третман, вклучувајќи шест хемотерапии една по друга. Тој изгуби околу 15 килограми за време на борбата, не можеше да јаде и се хранеше преку цевка шест месеци.

„Беше ужасно да се поминува низ тоа откако починаа мојата сопруга и пријателите, но сега сум посреќен отколку што бев порано“, изјави Тучи за „Тајмс“.

Неговата сопруга, со која ги доби синот Никола и ќерката Камила, почина на 47-годишна возраст во 2009 година откако ја изгуби битката со ракот на дојка. Актерот претходно изјави дека никогаш не престанал да тагува по нејзината смрт.

Неколку години по нејзината смрт, тој самиот се бореше со рак, а сега проговори за тоа како болеста влијаела врз неговиот живот. Тој објасни дека сега го сфаќа своето здравје посериозно и станал фанатик за вежбање.

„Навистина не можам да издржам повеќе од 24 часа без да вежбам. Во многу подобра форма сум отколку што бев пред да се разболам. Имам посилно чувство за тоа кој сум, ќе наполнам 80 години за 15 години и има многу работи што сакам да ги направам пред тоа“, рече тој.