Министерството за внатрешни работи на Србија апелира дека видео кое се појави на социјалните мрежи, а на кое наводно се гледа момент од пукањето во основното училиште „Владислав Рибникар“, во кое беа убиени осум ученици и обезбедувањето, а шест ученици и еден наставник се повредени е лажно.

Министерството апелира до сите граѓани „да ја зачуваат разумноста и стабилноста во светло на сите немили настани“, особено кога станува збор за нашите деца кои следат информации од различни извори и медиуми. Неопходно е детските профили на социјалните мрежи да бидат под родителска контрола и возрасните да покажат највисок степен на одговорност и да не објавуваат или споделуваат непроверени и несоодветни содржини на социјалните мрежи, соопшти српското МВР.

Додаваат дека интензивно работат на откривање и пронаоѓање на лицето кое го објавило тоа лажно видео, кое дополнително ги вознемири граѓаните.