Средоземното Море ја забележа својата највисока температура на површината на морето досега за јуни, а научниците предупредуваат дека тековните морски топлотни бранови би можеле да имаат катастрофални ефекти врз морскиот свет, риболовот и временските услови низ целиот регион, пишува „ЕУ Инсајдер“.

На 29 јуни, температурите на површината на морето во Медитеранот достигнаа 26,01 степени – највисоко ниво досега забележано за месецот, според податоците од Коперник и анализирани од Метео-Франс. Моменталните температури се 3 степени над просекот, со скокови што надминуваат 4 степени во близина на францускиот и шпанскиот брег. Најинтензивното затоплување е забележано во западниот медитерански басен, вклучувајќи го Балеарското Море и Тиренското Море. Научниците велат дека, со оглед на моменталните временски услови, температурите веројатно нема да паднат во скоро време.

Подрачјето на Средоземното Море станува сè потопло секоја година, а во јуни просечната температура на површината на морето била 24,3 степени.

Тоа е највисоката просечна месечна температура во последните десет години, со дури 1 степен Целзиусов над просекот за тој период од годината.

Загрижувачка е и состојбата во Тиренското Море, кое во јуни 2025 година имаше просечна површинска температура од 25,1 степени Целзиусови, што е загрижувачко за растителните и животинските видови.

Во Јадранското Море е измерена температура на водата од 24,1 степени Целзиусови, освен во источниот дел на Јадранското Море, по должината на крајбрежниот појас од Црна Гора до Албанија, каде што температурите на површината на водата биле значително пониски.

Алармот го крена организацијата Легамбиенте, која во раните утрински часови организираше акција по должината на брегот на Јадранското Море, пловејќи со транспарент на кој пишуваше „Не е жешко. Ова е климатска криза“.