Младиот џез музичар Јован Цветковиќ од Куманово е годинашниот добитник на наградата за најдобар млад музичар на „Џез фабрика фестивал“ во Битола и тоа му даде поттик за понатамошно професионално себеостварување.

Основното и средното образование Јован Цветковиќ ги завршува во својот роден град Куманово, а потоа продолжува на Музичката академија при Универзитетот „Гоце Делчев“ во Штип на програмата за џез студии, отсек џез пијано. Своите настапи ги има започнато во раните студентски денови како пијанист на различни културни настани, како што се изложби, промоции и концерти. Има настапувано со неколку џез состави во склоп на факултетот и надвор од него.

Еден од поголемите проекти во кои учествувал се низа концертни настапи по повод 30 години партнерство на УСАИД во Македонија. Учествувал на повеќе музички работилници, а за свој најзначаен успех досега го смета настапот со трио формација на Кумановскиот џез фестивал, како и концертниот настап со „Тирана јут џез оркестра“ во Тирана.

Годинава ја доби и наградата за најдобар млад џез музичар на шестото издание на „Џез фабрика фестивал“ во Битола.

– Наградата на џез фестивалот во Битола за мене е од големо значење, за развој, пред сѐ, како личност, а потоа и како музичар, затоа што ми дава до знаење дека со многу труд и работа се постигнуваат резултати и секогаш по потешкиот пат се доаѓа до вредни нешта. Со оваа награда сакам да искажам благодарност до организаторите на „Џез фабрика фестивал“ во Битола, што го препознаа мојот труд и ми дадоа поттик за понатамошно професионално остварување – истакнува Цветковиќ.

Во однос на просторот и можностите да се самореализира како џез-музичар во својата локална средина тој смета дека има простор кај нас да се изрази и да биде слушнат, во зависност од тоа колку самиот музичар е спремен да соработува со луѓе, да договара и организира настапи, да работи на нов материјал и, секако, да биде оригинален на сцената.

Од друга страна, пак, посочува дека интересот би бил многу поголем за џезот, доколку би имало повеќе настани и фестивали каде би можело еден музичар да се реализира. Постојат можности и за излез од границите на нашата држава, особено кога се работи за џез музиката, која има интернационален карактер и присутност во сите култури на современото живеење. Сепак, својот предизвик за работа во областа на музиката го наоѓа тука.

– Овој период работев на музика за детска театарска претстава во Куманово, која е од копродукциски карактер, поддржана од Министерството за култура, по покана од актерот Никица Јанковски, каде што за првпат имав прилика да компонирам детска музика за театарот и да учествувам во процесот на изготвување на претставата, снимање и продукциска обработка на музиката – открива Цветковиќ.

(Текстот е објавен во „Културен печат“ број 194, во печатеното издание на весникот „Слободен печат“ на 2-3.9.2023)