Точно е дека вонредните мерки важат за сите граѓани. Јавноста со право реагира и е поемотивна кога верските прашања се „топ тема“ на денот. Точно е дека Комисијата е во континуиран разговор со надлежните институции. За волја на вистината имаме чекори од верските заедници кои може да се толкуваат како помош во тој момент кога беше најпотребно, истакна во „Утрински брифинг“ на „Слободна ТВ“ директорот на Комисијата за верски заедници, Даријан Сотировски.

Според него, треба да има одговорност за да не се создаде погрешна слика во јавноста.

-Доколку треба да направам еден заклучок – тоа би бил дека верските заедници не во целост го сообразија своето делување со потребите од колективната здравствена заштита, и сметам дека тука треба да има одговорност. За поздравување е тоа што ИВЗ два месеци ги имаше затворено џамиите, како и МПЦ со своето однесување околу Велигден. Доколку негуваме култура на постојан притисок врз институциите, а паралелно негуваме култура на неказнивост на прекршителите на законот, ние ќе се соочуваме со слика која во јавноста со право ќе се обсервира како анархична, смета Сотировски.

Тој вели дека мора д аима казни за да се спречи повторно прекршување на мерките.

-Комисијата во овие услови има само задача да ги пренесе ставовите од едната страна на другата и работите добронамерно да се решат. Доколку прекршувањата на мерките би се казниле, би превенирале нивно повторување. Доколку верските субјекти од страна на органите на прогон и правосудните органи се тртетираат рамноправно како и сите правни и физички лица ние не би збореле веќе за проблем, додаде Сотировски.