Големиот пожар во фабриката за градежни материјали во Тетово, кој пламна во понеделникот рано наутро, со крајни напори беше локализиран дури вечерта, а гаснењето продолжи и вчера. Пожарот го гаснеа околу 150 пожарникари од Тетово, Скопје, Куманово и Кавадарци. Напомош пристигнаа и припадници на армијата, како и полициски хеликоптер.

Пожарот целосно го парализираше животот во градот, а граѓаните, кои сѐ уште се справуваа со последиците од невремето и поплавените дворови и подруми, поголемиот дел од денот го поминаа затворени во своите домови. Некои од нив се „евакуираа“ од градот.

Во кругот на фабриката тешка механизација вчера ги расчистуваше остатоците од пожарот. Групата за процена од Центарот за управување со кризи проценила дека нема опасност од ширење на пожарот и заклучила дека не се исполнети условите за прогласување кризна состојба.

Од Центарот за јавно здравје Тетово препорачаа болните лица и децата да не излегуваат од дома ако немаат потреба или да носат заштитна маска КН 95. Општина Тетово, иако првично донесе одлука во наредните два дена да нема настава во училиштата поради загадениот воздух, сепак ги повика учениците да дојдат на училиште.

Тетово и вчера беше зачадено, а кај граѓаните се појави страв дека станува збор за испарувања опасни по здравјето. Некои тетовски семејства уште истиот ден го напуштиле градот стравувајќи од загадувањето.

Семејството на Ристе Аврамовски во понеделникот околу 14 часот набрзина се спакувало и заминало кај роднини во Скопје.

– Сонцето не се гледаше од густиот чад. Цело Тетово беше покриено со црн облак, а во воздухот се чувствуваше загаденост. Кога слушнавме дека училиштата нема да работат, јас и сопругата со нашите две малолетни деца решивме да заминеме кај тетка ми во Скопје. На излезот од градот, каде што беше пожарот, од густиот чад се намалуваше видливоста. Луѓето се движеа по тротоарите со полузатворени очи и со маски на лицето. Во еден момент видливоста падна на три метри. Воздухот смрдеше на изгорена пластика – раскажува Аврамовски за „Слободен печат“.

Огнот почна во големата управна зграда на поранешната фабрика „Македонија табак“ каде приватната фирма „Пофикс“ сега произведува и складира градежни материјали.

– Ова беше еден од најголемите пожари во мојата кариера. Сме фрлиле неверојатно големи количини вода – изјави вчера командантот на тетовската противпожарна служба Ука Алити.

При гаснењето двајца пожарникари и неколкумина граѓани кои помагале беа полесно повредени, односно вдишале чад, по што им била укажана лекарска помош.

Сопственикот на компанијата „Пофикс“, каде што изби пожарот, вчера им се заблагодари на пожарникарите и на сите што помогнале при гаснењето. Тој рече дека материјалната штета надминува 12 милиони евра. Според него, причината за пожарот е дождот што ден претходно предизвикал поплави во објектот. Тој претпоставува дека водата некаде предизвикала краток спој на електричната инсталација.

Тим од армијата со опрема која е донација од САД изврши мерење. Чад имаше, но немаше отровни материи. Нивната опрема може да детектира отровни испарувања. Граѓаните треба да бидат спокојни, нема никаква опасност по нивното здравје – изјави вчера Стојанче Ангелов, директор на Центарот за управување со кризи за „Утрински брифинг“.

Според Ангелов, фабриката не е целосно изгорена, туку само нејзини делови, а долготрајноста на пожарот се должи на составот на материјалите што биле во погоните и магацините. Тоа се материјали што кога еднаш ќе се запалат, горат долготрајно и тешко се гаснат, вели тој.

– Беше користена пена за гаснење, а кога се потроши, беше побарано пена од скопскиот аеродром ТАВ. Ако се гаснеше само со вода, можеше да дојде до експлозија и тоа ќе беше навистина опасна и трагична ситуација – вели Ангелов.

На мониторинг-станицата за квалитет на амбиенталниот воздух во Тетово не се видливи податоците за квалитетот на воздухот поради технички проблеми со главниот сервер – објасни вчера Министерството за животна средина и просторно планирање.

„Податоците редовно ги објавувавме, на секој час, во текот на попладневните и вечерните часови, а почнувајќи од 6 часот наутро се објавуваат и ќе бидат објавувани и во текот на денешниот ден. Во моментов податоците се достапни на веб-страницата и на официјалниот фејсбук-профил на Министерството. Нема место за паника зашто во воздухот се детектира сосема мало покачување на одредени параметри“ – велат од Министерството.

Се огласи компанијата „Пофикс“, чијашто фабрика гореше во Тетово: Не знаеме како избил пожарот