Изведувачите кои ја реновирале палатата на Софија Вергара во Лос Анџелес, ја тужеле 51-годишната актерка бидејќи, како што тврдат, не им платила повеќе од 1,7 милиони долари.

Во тужбата, до која стигнал магазинот „Пипл“ (People), се наведува дека на 27 ноември, „Reside Custom Homes“ ја обвинил Вергара дека не платила две фактури испратени до неа во март и јули 2023 година за завршена работа на домот, во вкупна вредност од 1, 7 милиони долари. Покрај тоа, тие ја обвиниле актерката за прекршување на договорот, измама и намерно мешање во договорните односи.

Имено, Вергара ја ангажирала компанијата во април 2022 година за да ѝ ја реновира куќата, а компанијата според договорот ја завршила работата до декември 2022. Тогаш актерката наводно побарала од нив да направат дополнителна работа. Во тужбата се наведува и дека актерката „имала агресивни испади и ги понижувала, исмејувала, малтретирала и се обидувала да ги заплаши нивните вработени“.

Се огласи и адвокатот на актерката, Мартин Сингер.

„Мојата клиентка поднесе жалба против изведувачот неколку месеци пред поднесувањето на оваа лажна тужба. Тврдењата на Софија Вергара се однесуваат на значителни преплаќања од страна на ‘Reside Custom Homes’, неквалитетна и несовесна работа и доцнење, за што таа бараше отштета поголема од 5 милиони долари. Верувам дека мојата клиентка ќе победи во овој случај“, рекол тој во изјавата за „Пипл“.