Градското собрание на Нови Сад денеска ја усвои иницијативата на градоначалникот Жарко Миќин за поставување споменик за 16-те жртви од уривањето на настрешницата од зградата на железничката станица во Нови Сад, а советниците од опозицијата ја напуштија седницата во знак на протест и не гласаа, јавува Н1 телевизија.

Опозицијата изјави дека „режимот нема кредибилитет да поддржи вакви иницијативи и да подигне споменик на жртвите, бидејќи владата е одговорна за оваа трагедија“.

Студентите на факултетот во Нови Сад, исто така, протестираа против иницијативата на градоначалникот.

„Сега сакаат да подигнат споменик на оние што ги убија со нивната корупција. Ние никогаш нема да го дозволиме тоа“, рекоа студентите.

Студентите и граѓаните и денеска протестираа пред зградата на Градското собрание, која од вчера беше опкружена со метални огради, а присутни беа и полициски и жандармерски сили. Улицата пред зградата на Собранието беше блокирана за сообраќај.

Опозиционерите на влезот во Градското собрание беа претресени од обезбедувањето, а беа претресени и новинарите кои известуваа од седницата.

Ова стана практика откако траат протестите пред зградата на Градското собрание.