Жителите на Автокоманда се изјасниле позитивно на теренската анкета што ја спровела Општина Гази Баба за тоа дали сакаат во нивната населба да се воведе зонско паркирање, со кое би требало да се реши проблемот со паркирање со кој се соочуваат овие граѓани.

Во таа насока, вчера во Културниот дом Димитар Влахов во Автокоманда пред граѓаните беше одржана јавна презентација на Сообраќајната студија за режим на сообраќај во Автокоманда, како и на предлогот за воведување на Зонско паркирање.

Оваа средба е доказ за мојата решителност да се стави крај на деценискиот проблем кој го има Автокоманда со сообраќајниот хаос. Општина Гази Баба има спроведено теренска анкета со посета на сите домаќинства во Автокоманда на која мнозинството од домаќинствата даде поддршка на пакетот кој е понуден на граѓаните во Автокоманда за воведување на Зонско паркирање – информира градоначалникот Бобан Стефковски, задоволен од големиот одзив на граѓаните на јавната презентација.

Тој вели дека ќе продолжи низ дијалог со граѓаните на Автокоманда да работи на изнаоѓање на вистинското решение за постоечките проблеми.