Во живописниот Пустец во Република Албанија од 1 до 5 јули се одржува јубилејното 20. издание на „Македонско културно лето“, во организација на Здружението на Македонците по потекло од Албанија „Сонце“. Фестивалот, кој претставува симбол на културната виталност и самобитност на Македонците во Албанија, нуди богата програма со театарски претстави, концерти, изложби и активности за најмладите.

Настаните се одвиваат на неколку локации, вклучувајќи го плоштадот „Гоце Делчев“ и Музејот на Стерјо Спасе во Глобочани. Фестивалот беше отворен на 1 јули со претставата „Снежана и седумте џуџиња“ на НУ Театар Битола, а вечерта заврши со концертот „Мала Преспа – Голема Песна“ на Драган Даутовски и ансамблот „Илинден“.

Претставата „Снежана и седумте џуџиња“ е поставена по текст на Љубивое Ршумовиќ, но се употребени и референци од бајките на браќата Грим во режија на Драгана Милошевски Попова, драматург е Билјана Крајчевска, сценографијата е на Валентин Светозарев, костимограф е Андреј Ѓоргиевски, композитор на музиката е Марјан Неќак, а кореограф е Игор Киров.

Во театарската изведба на „Снежана и седумте џуџиња“ публиката е сведок на борбата помеѓу доброто и злото, преплетена со хумор, емоции и музика. Улогата на Снежана ја игра Ана Грамосли, а во останатите улоги играат Никола Стефанов, Јулијана Мирчевска, Катерина Аневска Дранговска, Борче Ѓаковски, Никола Пројчевски, Маријан Ѓоргиевски, Живко Борисовски, Александар Димитровски, Петар Спировски, Александар Копања и Марија Стефановска. Суфлер е Гордана Михајлова, а инспициент е Димитар Михајловски.

Во следните денови на „Македонско културно лето“ ќе биде изведена претставата „Вечера за глупаци“ на НУ Театар „Ј.Х.К. Џинот“, концерт на Сашко Костов и Орхидеја Дукова, изложба на фотографии од Охрид и Преспа, како и детската претстава „Рибарот и златната рипка“ според Пушкин. Свеченото затворање е предвидено за 5 јули, во 14 часот, со настап на ансамблот „Преспа“ на сцената во „Остров Мал Град“. Настанот се одржува со поддршка на Министерството за култура и туризам на Македонија.