Кивито е познато по својот уникатен вкус, но исто така е и богато со витамини K, E, фолна киселина, калиум и други хранливи материи. Има малку калории, што го прави одличен избор за оние кои сакаат да ослабат. Во ова зимско овошје ќе ги најдете речиси сите хранливи материи, а неговата златна варијанта (Actinidia chinensis) обезбедува значително поголем внес на витамин Ц отколку портокалот, пишува „Живим“.

Покрај тоа што го зајакнува имунитетот и штити од настинки, консумирањето киви има и други значајни здравствени придобивки.

1. Помага при респираторни болести

Благодарение на високата содржина на витамин Ц, кивито може да помогне во подобрување на респираторните проблеми, како што е астмата. Една студија покажа дека кивито има заштитен ефект кај деца со респираторни потешкотии и астма. Друга студија потврди дека витамините Ц и Е го подобруваат функционирањето на белите дробови кај децата.

2. Ја зајакнува работата на срцето

Кивито е одлично за здравјето на срцето. Истражувањата покажуваат дека неговата консумација може да го намали ризикот од мозочен удар, висок крвен притисок, тромбови и кардиоваскуларни заболувања. Калиумот во кивито помага во намалување на крвниот притисок и делува како вазодилататор, опуштајќи ги крвните садови. Влакната од кивито се корисни за здравјето на срцето. Витаминот К спречува таложење на калциум во артериите, со што го намалува ризикот од срцев удар. Ова овошје е богато со омега-3 масни киселини, магнезиум, витамин Е и бакар, што го прави идеално за правилно функционирање на кардиоваскуларниот систем.

3. Го подобрува варењето

Кивито е богато со растителни влакна, кои ја регулираат пробавата, помагаат при запек и дијареја – два чести дигестивни проблеми. Калиумот во кивито е важен електролит за правилно варење. Студиите покажуваат дека може да ги намали симптомите на синдромот на иритабилно црево и воспалителните заболувања на цревата.

4. Го регулира шеќерот во крвта

Кивито може позитивно да влијае врз контролата на шеќерот во крвта. Неговиот низок гликемиски индекс и високата содржина на влакна го прават корисно овошје за дијабетичари, особено за оние со тип 2 дијабетес.

5. Го намалува ризикот од остеопороза

Кивито содржи витамин К, кој е неопходен за здрави коски. Овој витамин помага во апсорпција на калциум, што придонесува за јаки и здрави коски и намалување на ризикот од остеопороза.

6. Го подобрува квалитетот на сонот

Една студија откри дека јадењето киви пред спиење може да го подобри квалитетот на сонот. 24 учесници во текот на 4 недели јаделе по две кивија пред спиење. До крајот на студијата, нивниот сон се подобрил за 42 отсто.

7. Ја подмладува кожата

Кивито е одличен сојузник во борбата против стареењето на кожата. Колагенот, кој е неопходен за еластичноста на кожата, мускулите, коските и тетивите, се разградува со стареењето. Кивито е богато со витамин Ц, кој е клучен за одржување на младешки изглед. Истражување објавено во „Journal of Cellular Physiology“ покажа дека полисахаридите во кивито можат двојно да ја зголемат синтезата на колаген во телото.