Македонскиот народен театар на 17 септември, во 21 часот, ќе ја отвори својата нова летна сцена, која името го доби по актерот Славиша Кајевски (1982-2021). На отворањето на сцената ќе биде изведена хип-хоп претставата „Црнила ремикс“ во режија на Јордан Симонов и во продукција на Младинскиот културен центар (МКЦ) од Скопје.

Режисерот Јордан Симонов заедно со Дарко Димитриевски и Павле Димковски од рап-колективот „Зад аголот“ направија современо читање на драмската класика „Црнила“ од Коле Чашуле и ја поставија како современ проект.

Талентираната актерска екипа, односно Организацијата, која пренесува силни емоции преку прекрасни мелодии, рими и динамика, кои произведуваат своевидна хип-хоп опера, ја сочинуваат: Стефан Вујисиќ, Александар Михајловски, Владимир Петровиќ, Горан Ников, Ненад Анѓелковиќ, Сања Арсовска и Павле Димковски – колектив „Зад аголот“.

Ова оригинално сценско дело има настапувано на повеќе домашни и меѓународни фестивали, меѓу кои и на „Егзит“, а за најдобра употреба на музика ја добива наградата на меѓународниот театарски фестивал за џез „Нишвил“ во Р Србија.

Програмата на летната сцена „Славиша Кајевски“ во МНТ ќе се изведува од 17 септември до 1 октомври и содржи театарски претстави, стендап на Сашко Коцев, концерти и настап на диџеи.