Непознат напаѓач влегол во судница и го застрелал апелацискиот судија Астрит Каљаја, кој бил однесен во болница во Тирана каде што му била пружена медицинска помош, но кусо потоа подлегнал од здобиените повреди, објавува „Албанијан пост“.

Дел од куршумите погодиле и уште две лица, татко и син, кои се вон животна опасност.

Сторителот Ѓан Шлемби испукал три куршуми во судијата Калаја, веднаш откако почнал да ја чита донесената одлука во врска со неговиот случај.

Судијата Калаја водел случај околу сопственоста на поранешна училишна зграда во северниот град Скадар, во која биле сместени 31 семејство. Семејствата го тужеле Шлемби дека со фалсификувани документи станал сопственик на објектот и на околната површина и барал од нив да го напуштат објектот.

Се истражува како убиецот минал преку неколку физички проверки и детектори за метал.

Инаку, судијата Астрит Каљаја со години служел во албанскиот судски систем, а од неодамна бил во Апелациониот суд во Скадар.

Тој поминал низ процес на проверка во 2019 година, каде што бил потврден на функцијата од Независната квалификациска комисија, а потоа и од Специјалниот жалбен панел во 2022 година.