Националното собрание на Словенија ја одобри пензиската реформа. Коалицијата ги истакна пристојните пензии и одржливоста на пензискиот фонд, додека опозицијата посочи на влошената состојба на пензионерите. Со реформата се зголемува возраста за пензионирање и процентот на проценка, се продолжува референтниот период за пензиската основа и се менува методот на прилагодување на пензиите, информра Н1 Словенија.

Пратениците гласаа за амандманот на Законот за пензиско и инвалидско осигурување, подготвен од владата кој ја зголемува потребната возраст за пензионирање за три месеци годишно од 2028 година, а од 2035 година ќе биде 62 години за оние со 40 години пензиски стаж и 67 години за оние со најмалку 15 години осигурителен стаж. Предвидени се некои исклучоци, но се задржува и условот од 40 години стаж. Се зголемува процентот на проценка за пресметување на пензијата, кој ќе биде 70 проценти за 40 години стаж, а ќе биде можно дополнително да се зголеми со работа по 40 години.

Во исто време, референтниот период за пресметување на пензиската основа се продолжува од најдобрите 24 години на 40 години, при што се одбиваат петте најлоши години. Се менува и методот на прилагодување на пензиите, кои претходно беа прилагодувани според односот од 60 проценти од растот на просечната бруто плата и 40 проценти од инфлацијата. Во текот на следните десет години, пензиите ќе се прилагодуваат во односот од 50 проценти од просечниот раст на бруто платата и 50 проценти од инфлацијата, а потоа постепено до 2045 година односот ќе се помести на 80 проценти од инфлацијата и 20 проценти од просечниот раст на бруто платата. Амандманот, исто така, воведува одредби за годишниот додаток, кој пензионерите ќе го добиваат според прогресивна скала, и воведува право на зимски додаток, кој ќе се исплаќа во унифициран износ за сите пензионери оваа година.