Словачкиот парламент денес, на предлог на Владата, усвои амандман на Уставот, со кој се ограничуваат правата на истополовите парови и се отежнува промената на полот, а при регулирањето на ваквите прашања приоритет им се дава на домашните закони, а не на регулативите на ЕУ, јавува N1.

За предлогот 90 од 99 присутни пратеници гласаа. Опозицијата не учествуваше во гласањето.

Гласањето, првично закажано за среда, беше одложено на неодредено време, бидејќи Владата процени дека нема мнозинство за да го усвои амандманот, но денес беше ставен на дневен ред на Парламентот.

Во мислење објавено во среда, Венецијанската комисија, советодавно тело на Советот на Европа составено од експерти по уставно право, ја предупреди Словачка да не усвојува таков амандман, бидејќи државите не треба да создаваат конфликт помеѓу „културните прашања“ – како што словачките власти ја разгледуваат оваа тема – и меѓународните договори што ги потпишале.

Во текстот на амандманот е напишано дека за такви „културни и етички прашања“, како што се оние што се регулирани со амандманот, Словачка треба да има „суверенитет“ – приоритет пред правото на ЕУ.

Словачка е членка на Европската Унија од 2004 година и се обврза да ги почитува основните права по пристапувањето.

На крајот на јануари, по објавувањето на текстот на предложениот амандман, националистичкиот премиер Роберт Фико се повика на „традициите, културното и духовното наследство на нашите предци“ со цел да се отстрани „уставната пречка за прогресивизмот“ и да се „врати здравиот разум“.

„Имаме два пола: машки и женски, утврдени при раѓање“, се вели во текстот, повторувајќи го она што го кажа американскиот претседател Доналд Трамп.

„Полот може да се промени само од сериозни причини, во согласност со условите што ќе се утврдат со закон“, се вели во текстот на амандманот, кој им дава право на посвојување деца само на брачни парови, со ретки исклучоци.