На четворица обвинети од криминалната група на Вељко Беливук и Марко Миљковиќ денеска Апелациониот суд во Белград им го укина притворот и му наложи на првостепениот суд повторно да одлучи за нивниот притвор.

Станува збор за обвинетите Владо Георгиев, Жељко Коџиќ, Слаѓана Секулиќ и Никола Стефановиќ за кои Специјалниот суд повторно ќе треба да го разгледа случајот и да ги образложи причините за притвор.

Во притвор остануваат Беливук и Миљковиќ и останатите припадници на криминалниот клан, кој им е продолжен на 30. јули па Апелацискиот суд нивниот притвор воопшто не го разгледувал.

Кај шест од обвинетите белградска Апелација укина само некои од причините за одредување на притвор, а некои се потврдени. Станува збор за решенијата кои се однесуваат на обвинетите Владимир Греко, Борис Карапанџиќ, Александар Вучељиќ, Филип Ивановски, Алекса Дуњиќ и Алекса Стошиќ, потврди за Танјуг портпаролката на судот.

Но новата одлука за притворот кон сите треба да биде донесена утре, зошто изречените 30 дена им истекуваат викендов.

Според обвинението од Обвинителството за организиран криминал, 30 лица се обвинети, а само тројца од нив не се во притвор.

Групата на чие чело се Беливук – наречен Веља Невоља и Миљковиќ познат како Месар се обвинети дека од почетокот на 2019 година до апсењето во февруари годинава под закрила на навивачката група на ФК Партизан „Принципи“ учествувале во пет тешки убиства, од кои некои биле само инволвирани во едно, а други во две или повеќе, а некои во сите пет наведени во обвинението.

Истрагата против групата е покрената на 5. февруари и потоа е проширена уште шест пати.

Бранителите на обвинетите за убиствата одлучија повеќе да не соработуваат со судот, а го оспоруваат и начинот на прибирање на податоците од апликацијата „скај“ меѓу кои има и видеа, аудио записи, фотографии и пораки меѓу членови на групата кои сведочат за нивните злодела, зошто пред чинот на убиство жртвите се брутално малтеретирани и сакатени, а по смртта во мелницата за месо во куќата во Ритопек, нивните тела се мелени, а потоа фрлани во Дунав.

Вознемирувачки фотографии од злосторствата кои ја шокираа српската и регионалната јавност изминатиот период беа прикажувани на српските телевизии од страна на претседателот Вучиќ и министерот за внатрешни работи Вулин, а се појавија и на насловните страници на најтиражните српски весници, како и во онлајн изданијата. Случајот предизвика своевиден потрес на српската политичка сцена и обвинувања меѓу власта и опозицијата кој го поддржувал криминалниот клан на Веља Невоља.