Хрватската компанија „Талент Шоу“, ги откупи правата за емитување на содржината од „Светот на Биби“ за териториите на Хрватска, Словенија и Босна и Херцеговина.

Од следната година, децата во Хрватска, Словенија и Босна и Херцеговина ќе уживаат во анимираната содржина од „Светот на Биби“ на најгледаните телевизиски канали. „Сказните на Биби“ ќе се станат неизбежен дел од детската телевизиска содржина во регоионот.

 „Оваа соработка покрај квалитетот кој го нуди ни овозможува да изградиме платформа која ќе биде извор на знаење, возбудливи искуства и прекрасни откритија. За нас, влегувањето во „Светот на Биби“ е можност да ги едуцираме децата низ различни теми на начин што ќе ги заинтригира и забавува. Соработката со „Светот на Биби“, кој ја споделува нашата страст за едукативни содржини кои се безвременски, заедно ќе создадеме уникатна, информативна и забавна содржина што ќе им овозможи на нашите најмлади да истражуваат и истовремено да се забавуваат. Ова е само почеток на едно возбудливо патување, ќе зачекориме во „Светот на Биби“ со нова енергија, ентузијазам и креативност“, вели Маја Клајниќ, маркетинг менаџер во „Талент Шоу“.

Првата епизода на „Светот на Биби“ беше емитувана во октомври 2018 на Јутјуб, каде што некои содржини од серијалот постигнаа повеќе од милион прегледи. Главната сценаристка на серијата е Билјана Црвенковска, Михајло Димитриевски-Тхе Мичо е уметнички директор, а како режисери се менуваа Гоце Цветановски и Никола Чикос.

Инаку, „Светот на Биби“ веќе е достапна на српски јазик, а се работи и на албанската верзија, која е поддржана од Фондот за иновации.