За европскиот комесар за економија, Паоло Џентилони, корупцискиот скандал во кој високи претставници на Европскиот парламент наводно биле вмешани во недозволени врски со Катар, претставува „сериозна повреда на угледот” на оваа институција на ЕУ.

Белгиските власти истражуваат „исплата на големи суми пари или нудење значајни подароци на трети лица кои имаат политичка и/или стратешка позиција што овозможува, во рамките на Европскиот парламент, да се влијае на одлуките на оваа институција.

Шестмина осомничени беа уапсени во петокот во Белгија, меѓу кои и потпретседателката на Европскиот парламент Ева Каили, поранешниот италијански европратеник Пјер-Антонио Панцери и генералниот секретар на Меѓународната конфедерација на синдикати (ITUC) Лука Вичентини, исто така Италијанец. Четворица од шестмината уапсени беа обвинети и беа затворени во неделата, меѓу кои и Ева Каили.

„Тоа е многу сериозна повреда на угледот” на Европскиот парламент, „срамна и неподнослива афера”, рече Џентилони за државната телевизија РАИ.

„Европскиот парламент отсекогаш бил врв на правата, веројатно не му биле дадени доволно овластувања, но во однос на принципите секогаш бил референтна точка”, рече тој.

„Ако се потврди дека некој добил пари за да се обиде да влијае на мислењето на Европскиот парламент, мислам дека тоа навистина ќе биде еден од најдраматичните случаи на корупција во последните години”, додаде еврокомесарот.

Сопругата и ќерката на Пјер-Антонио Панцери, исто така, беа уапсени во Италија според европската потерница издадена од белгиското обвинителство, осомничени дека знаеле и користеле финансиски или во натура бенефиции што ги добивал поранешниот европратеник. Нив им беше одреден домашен притвор.

Според документите на белгискиот суд што ја придружуваат европската потерница што ја консултираше агенцијата Анса, Пјер-Антонио Панцери е осомничен дека го искористил своето влијание во Европскиот парламент „во корист на Катар и Мароко”.

Аферата изби во текот на Светското првенство во 2022 година, додека земјата организатор мора да вложи напори да ја одбрани својата напаѓана репутација за почитување на човековите права, особено на работниците. Скандалот се случува и во пресрет на пленарната сесија на Европскиот парламент во Стразбур, каде односот меѓу ЕУ и Катар неизбежно треба повторно да се појави во дебатите, со оглед на актуелните разговори за визна либерализација за жителите на арапската земја.

Потпретседателката на Европскиот парламент, Гркинката Ева Каили, е под истрага за корупција поврзана со Катар