Премиерот Димитар Ковачевски, вицепремиерот за европски прашања Бојан Маричиќ и министерот за надворешни работи Бујар Османи денеска реагираа на вчерашните изјави на министерот за правда Кренар Лога, кој изнесе идеја во моментот кога ќе започне дебатата за уставните измени, да се отвори и прашањето за формулацијата „20 отсто“ во Уставот и нејзина замена со „албанскиот јазик“.

Според премиерот Ковачевски, приоритет во моментов е само вметнувањето на сите заедници кои живеат во Македонија, вклучително и Бугарите.

Лога вчера изјави дека покрај внесувањето на Бугарите во Уставот, можеби е време да се отворат и други прашања, како што е прашањето формулацијата „јазик што го зборуваат 20 отсто од населението“, да се замени со формулацијата „албански јазик“

Вицепремиерот Бојан Маричиќ вели дека сега „не е време за тоа“.

„Лично сметам, а мислам дека тоа е став и на Владата, иако не сме разговарале, дека е логично да се фокусираме на оние обврски коишто произлегуваат од преговарачката рамка. Така имаме најдобри шанси за успех и најдобри шанси да успееме во разумен рок оваа година да ги завршиме уставните измени. Секое дополнително прашање е вредно за разгледување, но не верувам дека сега е вистинското време за тоа зашто ќе земе и повеќе време и повеќе енергија, и ќе го комплицира процесот – вели Маричиќ оставајќи простор за сите прашања да се разговара по завршувањето на овој циклус на уставни измени“, вели Маричиќ.

На исто мислење е и шефот на дипломатијата Османи. Тој рече дека не знае која била целта на изјавата на министерот Лога, но истакна дека сегашниот процес за уставните измени не треба да се оптоварува и со други политички прашања, кои според него, можат да го поларизираат општеството уште повеќе.

На средба со новинарите, и собранискиот спикер Талат Џафери зборуваше за идејата на Лога, за други уставни измени, а рече дека според него нема никаков проблем, „сѐ додека тоа се постигнува и се прави со согласност на сите политички партии“.