Кошаркарската репрезентација на Шпанија по четврти пат стана европски шампион откако триумфираше во финалето на 41-то издание на Евробаскетот иако никој не ги вбројуваше меѓу главните фаворити.

Системската работа, посвесетеноста, пожртвуваноста, работата комбинирани со талентот и „професорот“ Серџо Скариоло е вистинската формулата за успех на шпанска кошарка. Во финалето на ЕП, Шпанците иако играа без играчи како Миротиќ, Љуљ, Родригез, Рубио, ја победија Франција која индвидуално е подобра, физички посилна и побрза, но сепак недоволно добра за тим и систем каков што има Шпанија.

– На ЕП дојдовме како осми фаворит за златото според официјалните прогнози, дојдовме без МВП играчи, без НБА ѕвезди, без Ол-стар играчи… Многу сум среќен што успеавме сите да ги победиме и среќен сум поради начинот на кој игравме во текот на целото првенство – вели селекторот Серџо Скариоло кој на Шпанија и ги донесе сите четири европски титули (2009, 2011, 2015 и 2022).

Италијанецот кој ја предводи „Фуријата“ вели дека шпанската кошарка со години се заснова на системот и дека секогаш се размислува чекор понапред. Резултатот доаѓа како награда, и Шпанија сега е актуелен светски и европски шампион. Уште поимпресивно е тоа што сите машки репрезентации, од најмладите до сениорските играа финале на Европското првенство.

– Се работеше многу, посебно во помладите категории. Направивме сè за да ја подготвиме оваа генерација за тоа што ја очекуваше на ЕП. Повеќето момци што играа тука играа и во квалификациите. Знаевме дека ќе имаме проблеми поради играчите во НБА и Евролигата можеби нема да сметаме на нив, што и во некоја мера се обвистини и затоа размислувавме и гледавме подалеку. Не можевме да очекуваме злато, но завршивме вистинска работа. Кога ќе ги погледнете помладите репрезентации, тие прават многу работи исто како нас и поради тоа растат тимски и индивидуално и тоа се пренесува и на сениорите. Дали сме повеќе или помалку талентирани од другите е дискутабилно, но секогаш се боревме – ја открива Скариоло тајната на успехот на шпанската репресзентација.

Италијанецот во минатото во репрезентацијата имаше кошаркарски суперѕвезди како браќата Гасол, Хуан Карлос Наваро, Серхио Љуљ, Хорхе Гарбахоса, Никола Миротиќ, но на штотутку завршеното ЕП немаше такви ѕвези и работата ја вршеше на поинаков начин.

– Можеби бев поагресивен сега отколку порано, ми дозволија да „додадам гас“ бидејќи тоа не им пречеше на играчите. Не ми беше дозволено тоа да го правам со претходната генерација. Како тренер, треба да се адаптираш за да направиш резултат – додава Скариоло.

„Фуријата“ и на ова ЕП покажа индивидуална класа, во финалето експлодираше Хуанчо Ернангомез со седум постигнат тројки, додека неговиот брат Вили беше прогласен за најдобар играч на Евробаскетот.