По тримесечна пауза, актуелниот број еден на АТП листата, Јаник Синер, повторно ќе излезе на терен  и тоа пред домашната публика на Мастерсот во Рим. Неговиот прв противник ќе биде Аргентинецот Маријано Навоне, кој веќе има една победа зад себе на турнирот.

Навоне, кој моментално се наоѓа на 99. место на светската ранг-листа, во првото коло беше убедлив против Италијанецот Федерико Чине, славејќи со 6-3, 6-3. Иако неговата најдобра позиција досега беше 29. место, Аргентинецот ќе се обиде со добар настап во Рим да го зачува статусот меѓу најдобрите 100.

Ова ќе биде првпат Синер и Навоне да се сретнат на АТП турнир. Иако Италијанецот важи за апсолутен фаворит, неговото отсуство од натпреварувачки ритам поради суспензијата може да му остави простор на Навоне да пружи посериозен отпор од очекуваното.

Победникот од овој дуел во третото коло ќе се сретне со победникот од натпреварот меѓу Алехандро Давидович Фокина и Јеспер де Јонг.