„Кина е еден од столбовите на новиот светски поредок“ рече унгарскиот премиер Виктор Орбан по посетата на претседателот на Кина Си Џипинг на Унгарија.

Најава за сеопфатно партнерство со Кина проширување на соработката во нуклеарната индустрија и други области, подобрување на врските со Кина – средбата помина во знакот на одбележувањето на 75-годишнината од дипломатските односи меѓу двете земји.

Претходно, Си во разговор со унгарскиот претседател Тамаш Суљок рече дека соработката меѓу Кина и Унгарија се заснова на меѓусебно почитување и доверба.

Тој посочи дека неговата земја е подготвена да го подобри развојот на врските со Унгарија на високо ниво и нагласи дека пријателството меѓу двете земји не е таргетирано или диктирано од трета страна.

„Вистинските пријатели ќе ги препознаете во тешките времиња“ – рече Си, цитирајќи една унгарска поговорка.

Претседателот на Кина, Си Џинпинг, и неговата сопруга Пенг Лијан претходно денеска беа свечено пречекани со воени почести во замокот Буда во Унгарија. Суљок, Орбан и нивните сопруги ги поздравија Си и неговата сопруга пред воената церемонија на вториот ден од нивната официјална посета на Унгарија.

Си и Суљок потоа ја следеа свечената парада на церемонијалниот баталјон на унгарските вооружени сили, Националната церемонијална коњаничка единица и полкот на грофот Ференц Надашди Хусар. По парадата, претседателот Суљок ги прими Си и кинеската делегација во палатата Шандор.

Си до утре ќе престојува во официјална посета на Унгарија, по повод одбележувањето на 75-годишнината од дипломатските односи меѓу двете земји.

Си отпатува за Унгарија по завршувањето на посетата на Србија на 7 и 8 мај, како дел од неговата европска турнеја, во чии рамки беше и во официјална посета на Франција.