Неколкудневната промотивна турнеја на швајцарскиот писател од германското говорно подрачје, Јонас Лишер, завршува со промоција на неговиот роман „Пролет на варварите“ на 15 септември, во 20 часот, во КСП „Центар-Јадро“.

Претходно, на 12 септември, Лишер имаше претставување во Галерија „Магаза“ во Битола, а на 13 септември во Домот на културата во Охрид.

Во романот „Пролет на варварите“, швајцарскиот писател Јонас Лишер ни прикажува една фиктивна приказна за кризата во 2008 година која е сместена, ни помалку ни повеќе, на милионерска свадбена прослава во луксузен ресорт во Тунис. Токму во овој ресорт, на своето службено патување престојува швајцарскиот претприемач Прајзинг, кој има прилика да го запознае свадбеното друштво на лондонски банкари и бизнисмени и да го посведочи нивниот пад во варварство по прогласот на државниот банкрот.

Јонас Лишер (1976) е едно од најеминентните имиња на современата германско-јазична книжевност. Неговата дебитантска книга „Пролет на варварите“ (2013) се смета за една од општествено најрелевантните текстови на современата европска книжевност и беше номинирана како за Германската, така и за Швајцарската книжевна награда за роман на годината.

Со романот „Крафт“ од 2018 година, Лишер ја освои Швајцарската книжевна награда, а оваа година е добитник и на престижната награда „Макс Фриш“ на градот Цирих. Покрај белетристика, Лишер пишува и есеи фокусирајќи се на теми околу популизмот, неолиберализмот, демократијата и миграцијата.

Гостувањето на Јонас Лишер во Македонија е реализирано како соработка помеѓу издавачката куќа „Артконект“, Здружението за германско-македонска соработка Скопје, Гете институт Скопје и швајцарската фондација „Прохелвеција“.

Разговорот со Јонас Лишер ќе го води преведувачката на книгата, Катерина Шекутковска, а за симултаниот превод ќе се погрижи проф. д-р Емина Авдиќ. Влезот е слободен.