Зарем не е неверојатно како едноставниот чин на јадење топка сладолед може да предизвика насмевка на вашето лице? Без разлика дали се работи за слаткиот вкус, кремастата текстура или целокупната носталгична атмосфера што ве поттикнува на насмевка, слободно може да се каже дека повеќето луѓе со задоволство ќе прифатат порција од омилениот замрзнат десерт секогаш кога ќе им се понуди.

Сладоледот несомнено е омилен десерт и на младите и на старите, особено во лето. Но, дали некогаш сте се запрашале што би се случило со вашето тело доколку јадете по една топка сладолед секој ден? „Итдис“ пишува за сите потенцијални ефекти што може да ги доживеете ако редовно уживате во сладолед.

1. Сладоледот помага при плодноста

Според Светската здравствена организација (СЗО), еден од шест парови се соочуваат со проблеми со плодноста ширум светот. Во 2008 година, епидемиолозите од Универзитетот Харвард споделија некои диететски фактори кои може да им помогнат на луѓето кои се борат со неплодност и открија дека внесот на високомасни млечни производи може да биде корисен. Чаша полномасно млеко или порција сирење се брои како една порција млечни производи со висока содржина на масти, исто како и сладоледот.

2. Може да развиете кариес

Ако не ги измиете забите веднаш по јадењето сладолед и не се одлучите за сладолед без шеќер, таквата навика може да ги зголеми шансите за развој на кариес. „Јадењето слатка храна без четкање на забите веднаш по оброкот може да има негативни ефекти врз вашето орално здравје“, вели оралниот хирург Џек Хиршфелд. Според него, конзумирањето шеќер може да го поттикне расипувањето на забите. Со оглед на тоа дека речиси сите сладоледи се направени со шеќер, секојдневното консумирање не може да биде добро за здрави заби.

3. Може да имате проблеми со спиењето

Студијата објавена во „Журнал оф слип медисин“ (Journal of Sleep Medicine) покажа дека јадењето храна со малку влакна и богата со заситени масти е поврзано со полесен сон и повеќе несоница. Јадењето повеќе шеќер, особено ноќе, ја намалува количината на длабок сон што го регенерира телото.

4. Може да се здебелите

Познато е дека сладоледот содржи многу калории, што не е најдобриот избор за оние кои се обидуваат да ослабат или да ја одржат посакуваната телесна тежина.

5. Може да имате зголемен ризик од замастен црн дроб

Некои сладоледи се засладени со фруктоза. Докажано е дека консумирањето на најмалку една порција храна направена со фруктоза секој ден, како што се одредени сладоледи, е поврзано со зголемен ризик од развој на безалкохолни масни заболувања на црниот дроб или состојба во која вишокот маснотии се таложи во црниот дроб.

6. Може да имате поздрави коски

Калциумот е клучна хранлива материја за здравјето на коските. Половина шолја сладолед содржи повеќе од 80 милиграми калциум, што му помага на вашето тело да се нахрани со овој важен минерал. Сладоледот содржи и магнезиум и цинк, две други хранливи материи кои го поддржуваат здравјето на коските.

7. Може да имате негативни последици по здравјето на вашето срце

Консумирањето премногу додадени шеќери може да има негативни ефекти врз здравјето на срцето. Американското здружение за срце препорачува ограничување на додадените шеќери на не повеќе од шест отсто од калориите секој ден.

8. Може да почувствувате надуеност

Кај луѓето кои се нетолерантни на лактоза, јадењето сладолед може да предизвика стомачни болки, дијареа, надуеност или други непријатни гастроинтестинални симптоми. Добрата вест е што денес има многу сладоледи кои не содржат млеко, па претставуваат идеално решение за оние на кои им пречи лактозата