
Што прави денеска: Софија Јанева, економистка и блогерка
Софија Јанева има 28 години и живее и работи во Скопје. По професија е дипломиран економист, а во слободно време ги споделува своите авантури и патувања на нејзиниот блог „Аdventures with Јaneva“ и на социјалните мрежи.
Препорачано
Патувањата се нејзината најголема страст. Почнува да патува уште од многу рана возраст со своите родители, од кои и ја следила љубовта кон патувањата, авантуристичкиот дух и желбата за истражување нови дестинации.

Денес, дестинациите кои ги посетува ги привлекуваат погледите на нејзините следбеници секојдневно. Секоја нова авантура на Софија е уживање и инспирација за нејзините скоро 30.000 следбеници на Инстаграм (@janeva), кои секојдневно уживаат во содржините кои ги пласира на социјалните мрежи.
Софија ни долови како изгледа еден нејзин ден…
Секој ден ми почнува исто, со многу ентузијазам, насмевки и мотивација. За мене, новиот ден е нова авантура! Станувам од кревет и веднаш почнувам со мојата утринска рутина за нега на кожа. Потоа моето прво кафе го пијам со партнерот и правам здрав доручек.

Кога не сум на некое забавно патување, секојдневните обврски ми се исти. Одам на работа во маркетинг агенцијата „Нико Медиа”. Освен патувањата, маркетингот е моја пасија затоа што секогаш си опкружен со луѓе и воедно имаш шанса да бидеш креативен.
Да се менаџираат две работи во исто време (маркетинг агенцијата и мојот блог) не е воопшто едноставно, но кога се работи со љубов ништо не е тешко!

Кога ќе се вратам од работа обично поминувам време со партнерот, пријателите или фамилијата, а ако ми остане време си планирам некое ново патување.
Забележав дека многу луѓе се интересираат за моите патувања и авантури, па решив да ги споделам со светот. Така се роди и мојот блог, по едно патување во Австралија пред 5 години кое навистина ме импресионираше и морав да ги споделам впечатоците. Подолг период размислував да започнам свој блог, а знаев дека блогот може да ми помогне да создадам независен животен стил во одреден момент во иднина.

Сепак најважно ми беше да ги документирам моите патувања и да пишувам за она што сметав дека на моите пријатели и семејство ќе им изгледа интересно. Освен за патувања, пишувам и содржини поврзани со новите модни трендови и мојот секојдневен живот.

Без оглед на која тема пишувам, најважно ми е содржината да биде оригинална, креативна, интересна и да ги пренесува личните искуства.
Денот ми завршува на два начини – или уморна од патување или од работа. И според мене нема поубаво чувство од тоа да знаеш дека денот ти бил продуктивен!






