Одвоеното спиење од партнерот некогаш било симбол на луксуз и статус, историски резервирано за кралското семејство и многу богатите луѓе. Пред стотици години, на пример, било вообичаено брачните парови меѓу европските повисоки класи да имаат одделни спални соби. Научниците денес велат дека таканаречениот „ноќен развод“ или „развод поради сон“ е добар затоа што може да обезбеди подобар ноќен сон.

Ноќниот или разводот поради сон може да биде корисен за партнерите

Денес е вообичаено брачните и паровите во врски да спијат заедно, во ист кревет. Но, понекогаш – од различни причини, од различни животни распореди до ‘рчење и зборување во сон – паровите може да изберат да спијат одвоено за да имаат подобар ноќен сон. Оваа ситуација е позната како „развод во сон“. А што велат научните докази за ефектите врз квалитетот на сонот ако партнерите спијат сами или заедно?

Паровите можат да одлучат да спијат одделно ако сонот на едниот партнер го нарушува сонот на другиот или двајцата го нарушуваат сонот еден на друг. Ова може да се случи од различни причини, а подразбира чести будења во текот на ноќта, неусогласени биолошки часови (на пример, едно лице си легнува подоцна од другото), спротивставени распореди (на пример, работници во смени), ‘рчење, треперење на нозете или зборување во сон. Родителите со бебиња и мали деца можат да изберат да спијат одделно за да избегнат нарушување на сонот на двајцата партнери. Партнерите со спротивставени преференции за опкружувањето за спиење, како што е едниот партнер кој сака ладна соба со вентилатор, а другиот претпочита топлина, исто така може да изберат да спијат одделно.

Кои се придобивките од одвоеното спиење?

Многу парови велат дека повеќе сакаат да спијат и дека подобро спијат покрај својот партнер. Но, кога научниците објективно го мерат сонот, како на пример, со електроенцефалограм (ЕЕГ) за проценка на мозочните бранови, податоците всушност покажуваат полош квалитет на спиење кога спијат заедно. Значи, кога партнерите спијат сами, одвоени еден од друг – тие имаат подолг сон, подобар квалитет на сонот.

Истражувањата исто така покажуваат дека кога едниот партнер има нарушување на спиењето, како што се несоница или апнеја во сонот, тие често ненамерно го будат својот партнер кога ќе се разбудат во текот на ноќта. Значи, одвоеното спиење  може да биде добра идеја ако еден од партнерите има нарушување на спиењето. Уште повеќе, студиите откриле дека нарушувањата на спиењето се поврзани со намаленото задоволство во врската, што значи дека одвоеното спиење всушност може да ги направи паровите посреќни.

Дали постојат некои недостатоци на одвоеното спиење на партнерите?

Некои луѓе не сакаат да спијат сами, велат дека чувствуваат удобност и чувство на сигурност и заштита кога спијат до својот партнер, а осаменост кога нивниот партнер не е покрај нив. Спиењето одвоено често е стигматизирано, а некои луѓе го доживуваат како „смрт на сексуалниот живот“ меѓу партнерите. Меѓутоа, експертите истакнуваат дека иако спиењето во одвоени кревети дава помалку можности за секс, тоа не мора да значи крај на интимноста.

Одвоеното спиење може да значи дека некои парови всушност имаат секс почесто. Познато е дека подобриот сон е поврзан со попозитивни чувства во врските, па затоа е можно желбата за интимност да се зголеми по добриот ноќен сон во одделни кревети. Терапевтите често им советуваат на партнерите отворено да разговараат за евентуален недостаток на интимност. Во тој контекст, тие ја споменуваат креативноста на некои клиенти, како што е жената која вовела „право на посети“ за нејзиниот партнер да доаѓа во нејзиниот кревет накратко пред спиење или наутро, пишува „еКлиника“.