Струга Трим Лум обезбеди пласман во плеј-офот на Конференциската лига што е последна пречка на патот кон групите. Актуелниот македонски шампион предводен од тренерот Шпетим Дуро во четвртокот беше поразен во Луксембург од Есперанж со 2:1, но благодарение на победата од првиот меч од 3:1, Струга оди во следната фаза во која ќе ги одмери силите против исландскиот првак Бреидаблик.

Струга ќе биде домаќин на првиот натпревар на 24 август, првично имаше информации дека ќе се игра во Елбасан, а сега од клубот тврдат дека истиот нема да се игра на албанско тло, туку во нашата земја, во Струмица. Реваншот е седум дена подоцна на 31 август во Исланд.

– Чудата на Струга Трим Лум сезонава продолжуваат, најавувајќи се со титулата шампион, стигнувајќи до „плеј-оф“ фазата од Конференциската лига, секако дека е историски ден, за нашиот клуб, исклучително големо достигнување. Секако дека сакам да му се заблагодарам на тимот, на момците за тоа што го покажаа на теренот, затоа што и самите видовте, не бевме рамноправни од 14 минута, да се игра европски натпревар не е лесно, но ние избравме, особено во првото полувреме требаше да го завршиме натпреварот со шансите на Ибраими и Шабани – изјави Дуро на прес конференцијата по возвратниот дуел со Есперанж.

Стратегот на Струга не ја коментираше судиската одлука да му се додели црвен картон на Радески во 14 минута, само нагласи дека доколку направил нешто недолично сигурно го заслужил, но тоа предизвикало проблеми во тимот. Да се игра со бројчана инфериорност на европски натпревар не е лесно.

– За овој успех, честитки до целиот тим, до сите момци за ова историско достигнување на Струга Трим Лум, за кое во овој случај не треба коментар, туку треба да му се заблагодари на целиот клуб, почнувајќи од сопствениците, раководниот штаб, фудбалерите. Ова е историски ден за нас. Сонот продолжува, секако ова е извонредно достигнување, имаме уште два натпревари, но да се радуваме денеска со ова достигнување. Додека од утре ќе размислуваме и за следните два натпревари – рече Дуро.