На денешен ден во 323 п.н.е.  починал Александар III Македонски. Поголемиот дел од своето владеење го поминал во воена кампања низ Азија и Североисточна Африка и создал една од најголемите империи во античкиот свет, која се протегала од Грција доСеверозападна Индија. Александар бил непоразен во битки и е широко познат како еден од најуспешните воени команданти во историјата.

Покрај величествените воени победи, неговиот живот бил обележан со дружење со некои од најпаметните луѓе на неговото време. Како што често е случај со големи луѓе од негов калибар, историските факти биле испреплетени со митови и легенди. Во продолжение прочитајте шест анегдоти од животот на Александар Македонски.

Тргни се, ми правиш сенка!

Александар имал репутација на исклучително мудар човек – не е ни чудо, ако знаеме дека до шеснаесеттата година го подучувал лично Аристотел. Тој ги ценел и другите грчки мислители, особено Диоген од Синопа. Додека му нудел сè што му посакувало срцето,  Диоген отсечно одговорил дека единственото нешто што го сака е да се потргне, бидејќи му правел сенка додека се сончал. Александар не го казнил за неговата дрскост, напротив, наводно само му кимнал на филозофот и си заминал.

Билката на непобедливоста

Наводно, Аристотел го советувал Александар да го освои островот Сокотра, а една од причините за тоа бил фактот дека насекаде на островот растело алое. Ако треба да ѝ се верува на легендата, познатиот војсководец подоцна го користел сокот од растението за да ги лекува раните на своите војници. Покрај тоа, пред долгите патувања, неговите војници пиеле сок од алое за да се заштитат од инфекции. Приказната вели дека токму ова растение ја направило неговата војска непобедлива.

Човек од збор

Еден од штитениците на Александар бил грчкиот историчар и реторичар Анаксимен од Лампсак. И покрај блиско пријателство со човекот кој напишал три книги за него, војсководецот, за време на освојувачкиот поход, имал намера да го уништи неговиот роден град. Кога Анаксимен му се приближил, на Александар му било јасно дека ќе го моли да го поштеди Лампсак, и го запрел со решително движење на раката. „Пријателе мој, се колнам во Стикс дека нема да ти ја исполнам желбата!“ рекол Александар со тон што не дозволувал понатамошна дискусија. Анаксимен прибегнал кон лукавство. „Навистина? А сакав да те замолам, господару мој, да го уништиш Лампсак“, рекол Анаксимен. Доследен на својот збор, војводата го поштедил градот.

Гордоста на војсководецот

Легендата вели дека еден од војводите на Александар му предложил лукава, иако не особено чесна стратегија: да го нападнат непријателскиот логор среде ноќ, кога сите спиеле. Гордиот Александар, гледајќи го со презир, му рекол: „Јас не крадам победи!“.

Египет? Само декорација!

Додека седеле покрај логорскиот оган, еден воин, човек со широки рамена и долга и густа црна брада, се осмелил да му го постави на Александар следново прашање: „Господару, зошто толку сакаш да го освоиш Египет?“. Александар му се приближил, го повлекол за брадата и му рекол: „Гледаш, пријателе мој, таа брада воопшто не ти е од корист, но, и покрај тоа, ја носиш како украс. Исто е и со мене и со Египет.“

Време е за топка!

Во Античка Грција, играта со топка била омилено хоби, а многу познати личности биле вистински мајстори во неа. Откако дознал за овој спорт, Александар, секогаш желен да се докаже, го ангажирал Аристоник Каристи, најголемиот експерт во игра со топка за да го подучува.