Музичката дива Шер (77) е обвинета дека го организирала киднапирањето на сопствениот син во 2022 година. Во документите приложени на суд се вели дека, таа ангажирала четворица мажи да го киднапираат нејзиниот син за да го спречат да се смири со неговата сопруга, пренесува „Дејли мејл“.

Имено, Илајџа Блу Алман, син на Шер и рок-легендата Грег Алман, во 2021 година поднесе барање за развод од сопругата Мари Анџела Кинг.

Една година подоцна, парот решил да се смири. Меѓутоа, по 12 дена поминати во хотел во Њујорк, на 30 ноември четворица мажи влегле во нивната хотелска соба и го киднапирале Илајџа. Тој ден парот прославувал годишнина од нивниот брак.

Судските документи кои ги откриваат деталите за киднапирањето на синот на Шер беа објавени оваа недела.

„Еден од четворицата мажи што го зеле ми кажа дека биле ангажирани од мајката на подносителот. Од август 2022 година, ми беше кажано дека можеби нема да го видам или да разговарам со Илајџа, кој моментално е затворен во установа за лекување“, објаснува сопругата Мари во документите.

Како што се објаснува, од Мари било побарано да го напушти домот на парот, кој всушност бил во сопственост на Шер. По наводното киднапирање, Илајџа поминал време под будното око на домашна помошничка, која била ангажирана од Шер.

Инаку, Илајџа беше отворен за неговата борба со зависноста од дрога и откри дека почнал да користи уште како тинејџер.

На почетокот на овој месец, персоналот на хотелот во кој Илајџа престојувал, го нашол како лежи во несвест пред влезот на хотелот, јавуваат странските медиуми. Два дена подоцна, полицијата наводно го придружувала Алман од хотелот до центар за рехабилитација.